Ei utfordring blir til helseteppe

Over ein herleg bacalaomiddag i januar kom svigermor med tre nøste Idena bomullsgarn i ein pose. «Du er jo så flink til å få brukt slikt.» Det er jo ei utfording ein må ta. Og raskt. Bomull er ikkje det eg bruker mest, så eg leita ei stund etter inspirasjon. Til slutt fann eg ut at eg hadde bruk for eit helseteppe til Lillefiks. Medan eg først var i sving, laga eg eit lite sett med converse-sko og ranglefant, eller elefantrangle om du vil.

Til teppet la eg opp 70 luftmasker med heklenål 3 og hekla slik:

1. omg: 1 fastmaske, 1 halvstav osv.
2. omg: fastmaske i halvstaven og halvstav i fastmaska under

Resultatet blir ganske fint:

Tre nøste var for lite, så eg måtte ein tur for å kjøpe meir garn. Enda med ein frisk turkisfarge og hekla på ein kant på same måte.

Matchande converse-sko må ein liten skjønning ha. Mønsteret stod i Familien nr. 1/2012. Eg vurderer òg å strikke denne tøffe trøya til etter kvart.

«Ranglefanten» er laga etter inspirasjon frå dette mønsteret, men tilpassa tjukkare garn og nål. Eit plastegg frå eit Kinderegg fylt med ris ligg inni og lagar passe ranglelyd.

Eg har også laga eit anna, større helseteppe i alpakka og silke.

–Snella–

Reklame