Feeds:
Innlegg
Kommentarar

Archive for the ‘Milesteinar i livet’ Category

Ein dag låg det berre der. Huset. Fjorden glitra og blinka i den sorglause sommarsola. Glade barneskrik frå stranda nedi bakken. Effektive kakk frå hakkespetten i grana.

– Vil du bu her?, sa herr Fiks.

Flytte? Flytte frå den nydelege heimen vår? Frå loftsleilegheita i byen? Frå teateret, Akerselva og kaffibarane? Frå det koselege biblioteket mitt og veggmåleria mine?:

.

Flytte frå dette?:

.

Fjorden glitra og blinka. Block Watne frå seint 80-tal.

­– Bøkene dine kan du ta med. Huset kan vi pusse opp og gjere til vårt, sa herr Fiks.

Eg kikka meg rundt. Eit elska hus og ein varm heim. Materialvala vitna om at byggherren hadde hatt god smak den gongen. Nemnte eg at fjorden glitra og blinka?

– Ja, her skal vi bu, sa eg.

Bøkene og garnlageret vart pakka ned og fylte ein diger tilhengar.

.

.

Vi har komme i gang med å fornye 80-talshuset. Vi tar det trinnvis, så foreløpig er dei gule veggane og gelenderet måla i «Klassisk hvit» frå Jotun og den rosa marmoren rundt peisen vekke. Eg ville gjerne hente fjorden inn i stova, så vi måla parketten lys gråblå. Fargen heiter «Frihet».

.

.

Enno er det ein del å ta tak i, og vi vil ha nok å gjere i åra framover:

.

.

Men fjorden glitrar og blinkar i den låge haustsola.

Snella

Read Full Post »

Når ein gifter seg ytst i havgapet, er det godt med ein lun cape over skuldrane i solgangsbrisen.

Eg tok utgangspunkt i denne capen/ponchoen frå Garnstudio, som eg synest sit så fint over skuldrane. Eg likte dessutan den høge halsen og at capen er strikka på tvers. (Blomsten som er festa til capen, kan du lese om i bryllaupsinnlegget.)

I staden for Fabel og Vivaldi brukte eg Alpakka og KidSilk i kremkvitt. Eg strikka str. S og la opp 70 masker slik at capen stoppar der armopningane tar til i originaloppskrifta.

Det er ei kjent sak at eg elskar sjiraffar, så den nest øvste knappen er sjølvsagt ein sjiraffknapp frå Snella og Petronella.

Brudebuketten med orkidear og callaliljer er omtalt her,og sjølve bryllaupsfesten her.

No nyt capen pensjonisttilveret på kontoret mitt, der den varmar skuldrane og nakken min på kalde dagar og minner meg om ein av dei finaste dagane i livet.

Snella

Read Full Post »

Treng du ei enkel og god oppskrift på alkoholfri velkomsttdrink i dåp eller andre lag?

Vi blanda Funlight jordbær- og rabarbrasaft med Farris og hadde oppi frosne bær istadenfor isbitar.

Etter ei stund tar bæra til å tine, og det dannar seg «silkeband» i drinken.

Ei av dei yndige gjesteprinsessene i dåpen døypte drinken prompte for «prinsessebrus» og gulpa likegodt ned fire glas på styrten.

Konklusjon: Fem av fem prinsesser tilrår «prinsessebrus». Friskt, raskt, lettvint, stilig og godt.

Eit anna alternativ er alkoholfri mimosa.

Snella

Read Full Post »

Schultüte eller Zuckertüte (direkte omsett: skulepose) er eit stort kremmarhus (kjegle) fylt med leikar, skulesaker og kanskje litt snop som nybakte elevar i Tyskland og Austerrike får første skuledag. Kremmarhuset skal gjere den spennande og kanskje litt skumle første skuledagen litt lettare. Tradisjonen begynte i Thüringen tidleg på 1800-talet og spreidde seg raskt.

Dette er ein koseleg tradisjon, synest eg, så alle førsteklassingar eg kjenner får schultüte. Mange lagar sjølve, og det finst handarbeidsbøker og eigne kurs. Så langt må eg innrømme at eg har kjøpt dei ferdig, men det er lett å bli inspirert av alle dei flotte, heimelaga schültütene rundtom på tyske bloggar, gjerne med matchande kjole som her:

Det finst mange gjer-det-sjølv-sider på nettet, mellom anna denne.

I år kjenner eg tre yndige små som skal begynne på skulen – og ei litt større som skal begynne på lærarskulen. Ho får sjølvsagt den vesle vampyren og litt vaksnare innhald: miniflaske Rotkäppchen, handkrem og smykke i tillegg til pennar og viskelær osv.

Årets schultüter frå snelleheimen:

Og med det ønskjer eg alle nye elevar – uansett nivå – lukke til!

Oppdatering mai 2014: Og no vil visst norske bokhandlarar innføre tradisjonen til Noreg. Skoletut, kallar dei det.

Snella

Read Full Post »

I dåpen til Fikslein inviterte vi 30 små og store gjester til fest og kaldtbord.

Sidan mange i familien har løkallergi, lagde vi ein buffé kjemisk fri for løk, kvitløk, grasløk, vårløk og purre.

På vårt løkfrie buffébord stod det

– spekemat med rikeleg tilbehør

Spekematen var i hovudsak kjøpt i Tyskland, så vi serverte små sylteagurkar, store kapers, sauerkraut, kokte egg i båtar med persille og emmentalerost i terningar til.

– flatbrød

heimebakt av Snellefar

– foccacia

Foccaciaoppskrifta til Wenche Andersen er uovertruffen og ein sikker vinnar i alle lag.

– oliventapenade

løkfritt blir det slik:

100 g svarte oliven
1 ss kapers
1 ss pinjekjerner
2 ss tomatpuré
2 ss olivenolje
1 ts balsamico
pepar

Det er berre å mose alt saman med stavmiksar e.l. Nydeleg på foccacia og flatbrød!

– parmesandip

Riv parmesan og rør den inn i crème fraîche med litt pepar. Enkelt og fantastisk godt!

– grøn salat

I staden for vårløk: rå fennikel

– potetsalat

av poteter, eple og druer med dressing av rømme og litt majones.

– bakt flaskegraskar

Bak litt graskarfrø, solsikkefrø og sesamfrø i omnen på 180 grader i 10 minutt. Skjer graskara i bitar, spray litt olje over og bak i omnen på 220 grader i ca. 30 minutt. Legg på serveringsfat og strø frø og frisk basilikum over.

To varmrettar hadde vi òg (så det var strengt tatt ikkje eit kaldtbord):

– hjortegryte med ris

I staden for løk gir bacon, sopp og litt tyttebærsyltetøy god smak.

– wienerpølser med brød

I ei restekorg på Panduro fann eg ark med bordkort til å trykke ut. På desse skreiv vi kva som var i kvar rett, så alle kunne unngå det dei eventuelt ikkje måtte tole.

Buffébord utan løk

I vindaugskarmane står det boksar i blå kartong med pålimte hjarte. Desse fylte vi seinare med popcorn. Veldig populært blant dei små! Takk til Tonerose for idéen og gode instruksjonar.

Ein annan god og løkfri rett er graskarpai. Må du også unngå både gluten, laktose og kjøt, er denne retten med laks ein vinnar.

– Snella –

Read Full Post »

Snella og Nøstets siste fellesprosjekt er dåpskjolen til Fikslein. Ønsket var ein tradisjonell kvit kjole med litt bunadspreg.

Brodert dåpskjole med bunadsbroderi

Kjolen er sydd etter grunnmønsteret 83001 Dåpskjole frå Stoff og stil. Den var relativt enkel å sy, og stoffet var greit å sy i og veldig lett å stryke. Sånn såg kjolen ut når den var sydd etter mønsteret.

Dåpskjole etter mønster

Dåpskjole etter mønster

Ein veldig fin dåpskjole, men det mangla det lille ekstra. Så ved å sette sammen delane på skjørtet til kjolen og kutte det i lengda, så laga vi eit mønster til kappa. Stoffet til kappa var tynt, gjennomsiktig og lett. Eit stoff som «levde» når ein tok i det. Ei skikkelig utfordring å jobbe med. Når det blei sydd i, drog symaskina med seg trådar i stoffet, omtrent som når ein tråd hektar seg i noko på ei nylonstrømpebukse. Men det fins alltid ei råd!

Til symaskina fins det mange ulike nåler. Dei fleste har vel høyrt om nåler til skinn og denim. Men det fins enda fleire. Blant anna ei som heiter kulespissnål. Eller jerseynål som nokon kallar den. Denne nåla er runda på ein anna måte og har eit anna spor framme på spissen som gjer at den ikkje drar med seg trådar i stoffet. Den er smart å bruke på blant anna «strikka stoff» som jersey, men fungerte òg utmerka på dette tynne stoffet.

Vel, som bileta under viser, så måtte det mange nåler til for å kontrollere stoffet. Den største utfordringa i forhold til mønster var å få ein fin boge under armen. Sidan det var så lite hald i stoffet, valte eg å legge inn eit skråband. Dette gjorde òg at det blei enklare å sy kappa fast til kjolen etterpå.

Dåpskjole

Dåpskjole

Til broderia har vi brukt mønster frå trysilbunaden og laga vår eigen kombinasjon. Takk til Husfliden i Trysil for at mønstra ligg ute! Blomsterrankane er brodert på same stoff som dåpskjolen og sydd på kappa. Vi valte å bruke brodergarn i to lillafargar, grønt, to gråfargar og svart. Mønsteret er teikna på med tusj som forsvinn i kaldt vatn.

Bunadsbroderi til dåpskjole

Som på ein bunad er ei sølje prikken over i-en på denne dåpskjolen.

Her kan du lese innlegg om dåpsfesten, den løkfrie festbuffeen, den alkoholfrie velkomstdrinken og ein annan alkoholfri velkomstdrink.

Snella og Nøstet

Read Full Post »

Matrosdress

Som lita hadde eg ein raud matroskjole, og Nøstet hadde ein kvit. Eg kan hugse at eg kjente meg så fin i den kjolen. Derfor var det soleklart at Fikslein måtte få matrosdress til 17. mai og dåpen. Eg valte det fine mønsteret til Dale. Buksa har eg strikka utan dei kvite stripene og med vrangbord nederst slik at pjokken kan bruke den litt lenger og i andre samanhengar.

 

Eg fann fine knappar med anker på på Bentes boutique på Sagene – ein spesielt fin detalj sidan det i tillegg til det maritime symboliserer håp. Dåpen har, som kjent, temaet «tru, håp og kjærleik»!

 

Min vesle matros har dessutan fått ekte marineuniformstjerner på kragen. Eg trur kanskje ikkje desse blir brukte lenger, for dei er å få kjøpt på den koselege museumsbutikken på Karljohansvern i Horten.

 

Matrosdress, anker og stjerne

 

Snella

Read Full Post »

… for dagen er du,Biletet er lånt frå www.annegeddes.com
og lyset er du,
sola er du,
og våren er du,
og heile det vakre, vakre,
ventande livet er du!

Karin Boye

Å vere heime med ein flunkande ny verdsborgar er stort og skummelt, skjønt og skremmande, sterkt, surrealistisk og supert på éin gong. Eg smeltar av eit smil, tårene siler når eg blir rørt, og livet kjennest litt større.

Og så så mykje fint ein kan strikke og sy til slike småtroll! Eg er så imponert over alt det flotte folk viser fram på bloggane sine. For tida leitar eg etter dåpsinspirasjon, og det er visst ikkje grenser for kreativitet. Takk til alle som delar! Eg lovar å legge ut bilete og eventuelle lure tips og idear når den tid kjem. Status så langt er at dåpskjolen – eit samarbeidsprosjekt mellom Nøstet og meg – er nesten ferdig. Det kjem sjølvsagt eit eige innlegg om den.

Invitasjonane er også sendt. Temaet for dåpen er «tru, håp og kjærleik», og til det synest eg det passar med enkle og reine invitasjonar.

Dåpsinvitasjon

Snella

Read Full Post »

Snellas venskapsteppeNår livet går ein litt imot og dagane er mørke og stormfulle, då er det beste som finst, å krype inn under venskapsteppet frå Nøstet. Varme, glede og dei gode minna er samla i dette teppet.

Eg kan tenke tilbake på 17. mai-fana vi så stolte bar gjennom regn og blest, smile til fiskane i garnet frå oppmøtekortet på søndagsskulen og storskratte av det den gong så flotte diktet vi fekk på trykk i lokalavisa. Det er som om Joshua Kadison og «Jessie» kjem krypande av seg sjølv medan to papegøyer skvaaakar og ler der borte i hjørnet. Då andre sat barnevakt, sat Nøstet og eg fuglevakt …

Nøstet har laga teppet av gamle dongeribukser, applikasjon, broderi og mykje varme og kjærleik. Teppet er quilta med hjarte og sydd saman med eit raudt, varmt teppe med hjarte på.

Snellas venskapsteppe er mjukt og lunt

Teppet har inspirert meg mange gongar. Då Susta var ferdig utdanna og skulle flytte ut i det ukjente, bestemte Cysta og eg oss for å lage eit liknande, om enn hakket mindre raffinert, teppe som ho kunne ta med seg på ferda. I dette la vi inn alt vi kunne av positiv energi og kraft, mellom anna den kjære, prikkete kakeboksen til farmor, Geher, ein flirande svart sau, ein overdimensjonert muffin og lommar til bamse, sjokolade og blokkfløyte.

Sustas venskapsteppe

Snella

Read Full Post »

Korleis muntre seg sjølv opp på ein grå februardag? Jo, ved å ta på seg ein hatt når ein skal ut, og sjå Poirot og drikke te om kvelden!

"Whitehaven mansions" - her bur PoirotAgatha Christie og Poirot ­– og først og fremst filmatiseringane med David Suchet som Poirot ­– har halde meg med selskap mang ein vinterkveld. Historiene er underhaldande, men det er først og fremst kulissene, språket, interiøret, antrekka og stemninga som gjer at eg ser filmane om og om igjen.

Den stramme og symmetriske, herlege art deco-stilen er ein draum.

Art deco-stilen har gitt meg mykje inspirasjon til eigendesigna strikkeplagg og interiør. I Poirot er Miss Lemon og dei andre velkledde damene verkelege stilikon.

I episoden «Lord Edgware dies» («13 til bords») såg eg ein rålekker hatt med skrå brem:

Hat with a slanted brim / ein hatt med skrå brem - frå "Lord Edgeware dies"

Ein slik hatt, i filmen omtalt som «very modern, with a slanting brim», måtte eg berre ha. Og lukka stod i taket då eg omsider fann ein. Med denne og ei elegant kåpe kjenner eg meg full av inspirasjon og sjølvtillit sjølv på grå vinterdagar:

Snellas hatt i grå filt med skrå brem

Hattane er ikkje dei einaste hovudplagga frå art deco-tida som er verd å nyte. Då eg skulle gifte meg, leita eg etter passande art deco-inspirasjon og vurderte brudeslør i art deco-stil.

Brudeslør i art deco-stil. Biletet er lånt frå http://weddingbellsblog.com.

Dette skjønne sløret minner om det farmor bar då ho stod brur i 1932. Eg skulle så gjerne kopiert stilen i mitt eige bryllaup, men det ville dessverre sett malplassert ut til resten av temaet.

Men eit lite art deco-element klarte eg å snike inn, elegante liljer i brudebuketten:

Snellas brudebukett med liljer og orkidear

Liljene går att i art deco-kunst, mellom anna i bileta til kunstnaren Tamara de Lempika, som er kjent for sine sterke portrett. Du kan skimte bileta hennar i bakgrunnen i fleire Poirot-episodar, mellom anna i «One, two buckle my shoe» («Siste time hos tannlegen»). Ein plakat med dette biletet, «Portrait de madame Ira Perrot», prydar eine veggen i snellebiblioteket.

Portrett av madame Ira Perrot. Tamara de Lempika

Litt meir art deco-inspirasjon *sikle*:

Art deco-inspirasjon

Berlin-tips: Under jernbanelinja i Georgenstrasse i Mitte kan du finne mange skjulte skattar i form av lekre vintage Art deco-smykke (og andre ting).

Snella

Read Full Post »

« Newer Posts