Sicily, hekla prosjektpose

Etter eg laga innlegget om den hekla ugla og såg dei nye fargerike uglene som designeren viste fram, blei eg inspirert til å hente fram bomullskassa og heklenåla. Først tenkte eg å lage nok ei ugle, men etter eg søkte rundt på oppskrifter med tjukkere bomull dukka det opp enda meir inspirasjon. På Drops sine sider fann eg ein hekla prosjektpose som kunne passe utmerka til det eg hadde av garn. Modellen har oldemorsruter og er meir ei veske, men eg valgte å heller bruke eine holrekka til snor og fekk ein enklere modell.

Sicily, hekla prosjektpose

Heklefakta:

Oppskrift: Sicily frå garnstudio.

Garn: Gul, kvit og mørk grøn Drops Paris, lys grøn Gjestal Føn og lilla Mayflower helårsgarn 

Heklekrok: 4.0

                                                                       *

Posen blei 25 cm i diameter og 35 cm høg. Det gjekk med 290 gram garn til pose og snor. Snora hekla eg med passe antall luftmasker og ein omgong fastmasker tilbake. 
– Nøstet –

Reklame

Read Full Post »

Kluter

Plutseleg kom sommaren til Vestlandet! Strålande sol og temperatur langt opp på 20-talet gjer at ullprosjekta blir lagt på vent nokre dagar til fordel for små prosjekt i bomull. Oppvaskkluter har alle bruk for, og nokre heimelaga i spreke fargar er flotte som smågåver til alle med kjøkken. I tillegg er eit slikt strikketøy perfekt å ha med på stranda. Kan lett strikkast på mens auga følger dei små i vasskanten og det er inga krise om nøstet skulle rulle ned i sanden eller om ein strikker med litt klissete solkrem på hendene. 

Oppvaskklut

 
  Strikkefakta: 

Oppskrift: Husmor Marias kopptue

Garn: Diverse bomullsgarn som Mandarin Petit og Safran

Pinne: 3,0

Oppvaskklut

 
 

For å få brukt opp dei mindre restane har eg prøvd ein anna variant. Her strikka eg ei dominorute i rillestrikk. Klutene brukte eg som ein teststrikk for eit større prosjekt. Målet var å få ei fin stripe langs midten. Første forsøk var den i blåfargar, mens forsøk når to i rosa og lilla fekk den stripa eg var ute etter.

Oppvaskklut

Strikkefakta:

Oppskrift: Dominorute. Legg opp oddetal masker. På pinnen frå rettsida har eg på dei tre midterste maskene tatt to masker av som strikka rett, strikka ei rett og løfta dei to maskene over. På den blå har eg strikka rett tilbake, mens på den rosa/lilla har eg strikka den midterste maska vrang.

Garn: Rester av Mandarin Petit og Safran

Pinne: 3,0

Oppvaskklut

Då får vi sjå kor lenge varmen held seg i denne omgong. Det er framleis litt bomullsgarn igjen på lageret!
–Nøstet-

Read Full Post »

Ein fin kveld i mai

Vi koser oss på hytta! Vestlandet har hatt eit fantastisk veir i det siste og både dagar og kveldar blir tilbragt ute.

 

Sånne kveldar vil vi ha mange av!

Innimellom blir det litt strikking. Eg held på med Mariusjakker til begge gutane mine. Monteringsvegring gjer at eg strikker begge før eg set igang med klipping og sying av glidelås. Nokre dagar har det vore så varmt at eg har måtte strikke med bomullsgarn istaden. Eit par oppvaskklutar har blitt strikka på hytta, men heklenåla låg igjen heime så kanten rundt får vi ta ein annan gong. Nepalnøsta er ein del av det neste store prosjektet. Både svogeren og svigerinna har runde dagar i år og har invitert til felles feiring i september. Så innan då håper eg at desse og mange fleire nøster har blitt trylla om til eit pledd. Kanskje blir det eit havskumteppe.

Prosjekt på gong

Late dagar i Nøsteheimen og Nøstehytta altså. Akkurat sånn det skal vere når Vestlandet byr på strålande sommerveir i mai.

 

God helg frå

– Nøstet –

Read Full Post »

Koseleg med hekla blonder på hytta

Ah, hytta! Ingenting er som hytta. Vi er heldige har fleire hytter vi kan bruke, og no skal den koselege gule i Stavern opnast for sesongen. Dette er ei klassisk norsk hytte med blått kjøken, smårutete dukar og blomstrete gardin. Gjett om eg blei glad då svigermor lurte på om eg kunne hekle nokre blonder til kjøkenet. Det er jo kjempegøy å hekle blonder, men det passar ikkje heime hos oss. På hytta derimot glir hekla blonder rett inn i kosen!

 *

Oppdrag 1: Pyntehandkle

 

*

Blonda er hekla i mercerisert Solberg-garn og etter eit enkelt filetheklingsmønster. Eg vurderte å trekke eit silkeband gjennom holkanten, men det ville nok blitt i overkant søtt.

Blonda er sydd på eit kvadratisk stoffstykke som er falda på alle sidene. Pyntehandkleet skjuler no kjøkkenhandkle og gryteklutar. På hylla står dei flotte gamle boksane til kaffi, «potetesmel», «the», sukker, kakao og kveitemjøl.

*

 *

Oppdrag 2: Gardinband

*

Gardinbanda er også hekla i mercerisert solberggarn, har ei slags blomsterrad i midten og rikeleg med picotar.

 

*

 

–Snella–

Read Full Post »

Free Spirit Hat igjen og igjen

No når det brått blei vår, trengte eldstemann ei tynn hue som gjekk under sykkelhjelmen. Free Spirit Hat som veslebror fekk i fjor, er heilt perfekt sidan den er strikka i tynt garn og i tillegg er ei morsom hue.

Free Spirit Hat i duse blåtoner

Nøsteguten er ikkje like glad i sterke farger som broren, så han gjekk for duse blåtoner. Ein rest av fleirfarga Opal og resten av Regia Silk som eg brukte til Fuglemammas omslagsbody passa fint. Igjen blei det riller i starten.

Free Spirit Hat

Når storebror fekk hue, kom Snuppa og lurte på når det var hennar tur. Ho ville ha alle fargar fekk eg beskjed om. Eit restenøste av Opal med lange fargeskift blei funnen fram, og fargerikt blei det. Sidan fargeskifta måtte passe med omgangane måtte eg kutte garnet for kvart parti, og på slutten gjekk eg tom for garn og måtte spleise inn igjen nokre av dei små restane eg hadde kutta av. Altså tok det omtrent like lang tid å feste alle ender som det tok å strikke hua. Men kva gjer det når Snuppa meiner ho har verdas finaste hue og snillaste mamma?

På bilete ser du forresten såvidt Tøysetoppen som eg strikka ifjor.

 

– Nøstet –

Read Full Post »

Nydeleg kappekjole til dukka

Nok ein jentebursdag stod for tur, denne gong til nok ei niese. Ho hadde eit par veker før sendt inn ønskeliste med dukkekle øverst, og gjerne kjole. Det burde vere grei skuring for tante med eit velfylt garnlager. Dukkeheftene blei leita fram og det samme blei kassen med bomullsgarn. Eg liker å prøve nye oppskrifter og fann ein kappekjole i 1207 dukke frå Sandesgarn (side 5) som såg fin ut, i bomullskassen fann eg nokre nøster med Safran som passa fint.

Kappekjole til Babyborn

Ei helg på besøk hos ei veninne inkluderte masse strikketid, så sjølv om det var mykje arbeid på kjolen gjekk det greit å bli ferdig i tide. I samme heftet (side 8) fann eg ei jakke som kunne passe til.

Jakke og kappekjole til Babyborn

Niesa blei strålande fornøgd, og det blei eg òg. No nærmer det seg Snuppa sin dag, og det er klart ho må få litt dukkekle òg. Kanskje skal eg prøve å sy dei denne gongen, og i tillegg har eg lagt opp til eit dukke-Umaroteppe.

Meir dukkekleinspirasjon finn du her.

– Nøstet –

Read Full Post »

Heilt på etterskot

Plutseleg var det 2014, men eg er framleis på strikkelista for 2013. Ambisjonane før jul var som vanleg alt for høge. Eg såg kjapt at eg ikkje rakk raggsokkar til den yngste broren min (som eg har lova at eg skal forsyne han med jevnleg). Så han fekk eit gåvekort på sokkar og fekk innløyst gåvekortet tidleg i romjula.

Raggsokkar

Som ein kan sjå feilberegna eg mengda garn, men sidan dette er arbeidssokkar spelar det lita rolle. Og det blir så mykje ryddigare i garnkassa når den eine fargen blir brukt heilt opp før ein startar på den neste.

I forrige veke leverte eg ut den siste julepresangen. Niesa var vekkreist i jula og skulle få presangen i romjula, men ikkje eingong den fristen greide eg å halde. Uansett var gleda stor då ho fekk pakke opp litt uti januar.

Babyborn dukkekle i Viking Bjørk

Oppskrifta fann eg i Allers Høststrikk 2013. Eg har strikka i Viking Bjørk som eg har masse av, det var visst eit lite sal på den lokale Husfliden ifjor. Eg blei ikkje så veldig imponert av garnet, så det kan vere at det blir mykje dukkekle i desse fargane framover.

I tillegg til dukkekle fekk niesa sengetøy til dukkevogna si. Eg sydde med det samme uglestoffet som Snuppa fekk til si dukkevogn ifjor.

No strikkar og syr eg vidare på 2013-lista. Snella får snart ei forsinka bursdagsgåve i posten, og saman med den kjem det nok samtidig ei forsinka dåpsgåve til den minste Snelleguten. Men SÅ er eg klar for 2014!

Godt nytt år alle saman!

– Nøstet –

Read Full Post »

Sjiraffar i sommerstemning

Endeleg har eg fått satt meg ned på syrommet litt igjen. I den hektiske kvardagen er det enklare å sette seg ned med strikketøyet foran fjernsynet når ungane er i seng, enn å ta turen på syrommet for å rigge seg til. Men her om dagen tok eg tak i meg sjølv og satte igang. Og det er jo så kjekt berre eg kjem igang!

Denne gangen har eg sydd ei dåpsgåve. Eg har hatt mønster på babydress i str 74 frå Stoff og Stil liggande lenge, og no var det endeleg ein liten pjokk som passa den størrelsen midt på sommaren.

Sommardress med sjiraffar

Stoffet som er brukt er det samme sjiraffstoffet som eg brukte til body ifjor, og enda har eg litt igjen til seinare prosjekt. Denne gongen kanta eg med grøn ribb og eg har kjøpt knappepresse frå Lykkedragen og flotte trykknappar i plast.

Kjekt med ny knappepresse

No er det ferietid og hyttetur som står på programmet, men når den er over har eg lova meg sjølv å bruke meir tid på syrommet!

– Nøstet –

Read Full Post »

Sommerens søteste strikk

Det var overskrifta til denne oppskrifta i eit Hjemmet i juni 2009. Snuppa var berre nokre månedar gammal og eg fell fullstendig for det meste av strikkeoppskrifter til jenter. Mangt og mykje blei lagra i favorittpermen til seinere bruk. Etterkvart har eg innsett at det er litt begrensa kva ein kan rekke å strikke, og nokre av favorittane er heldigvis ikkje like store favorittar nokre år seinere.

Men då eg bladde gjennom permen her for nokre veker sidan dukka altså denne opp igjen, og eg hadde framleis lyst til å lage den. I bomullskassa låg det lys lilla Drops Safran frå eit Dropssalg ifjor eller deromkring, så det var berre å sette igang.

Sommertopp designa av Lene Holme Samsøe

Toppen var lett å strikke, og var ferdig på nokre kveldar. Monteringa var litt klønete over skuldrane då desse «sommerfuglermane» skal rynkast før dei syast på. Etter eit par forsøk blei det greit nok. Snuppa var over seg av begeistring og maste seg til å få bruke den i barnehagen allereie dagen etter den var ferdig.

PS! Har du ikkje Hjemmet 25/09 liggande kan du òg finne oppskrifta på denne i Sandnesgarn sitt hefte 0904 Mandarin Barn.

– Nøstet –

Read Full Post »

Tøysetopp

Påska 2013 blei tilbragt på hytta i eit fantastisk påskeveir. Strålande sol og lite vind gjorde solkroken varm nok til å sitte ute og nyte solstrålande. Og når ein sit ute og koser seg er det kjekt å ha noko å drive med. Litt kryssord, litt krim og litt strikking.

Påskeidyll

Påskeprosjektet blei Tøysetopp frå Pickles. Eg kjøpte den første Picklesboka like før påske og hadde først planer om høstvest, men den får eg ta seinare. I bomullsboksen fann eg nemleg masse Paris og noko anna tilsvarande bomullsgarn eg hadde kjøpt inn for å strikke klutar av. Etterkvart er eg blitt meir glad i tynnare klutar, så Parisgarnet har blitt liggande. No passa det utmerka at det låg i lageret. Ein 4-åring toler masse fargar, så eg tok alle som passa ilag. Sidan eg strikker rimeleg stramt og 4-åringen veks i rekordfart for tida, satsa eg på str 6 år. Ein sånn vest kan fint brukast utanpå ullgenser når hausten kjem. Oppskrifta i str 6 år finn du faktisk gratis på Pickles sine nettsider.

Tøysetopp frå Pickles

Åååååh mamma, du er verdas beste som strikker så mykje fint til meg, var kommentaren eg fekk når eg visste ho den ferdige toppen. Ikkje vanskeleg å begynne på nok eit prosjekt til Snuppa etter den kommentaren, så vips var det noko nytt på pinnane.

– Nøstet –

Read Full Post »