Sommardåp for gullguten

Dåp i den flotte slottskyrkja på Akershus festning og feiring i hagen ein vakker augustsøndag, det måtte jo berre bli flott. Sola skein frå skyfri himmel, og strålane dansa på fjorden då dåpsfølget glei til kai på Aker brygge. Reine turistattraksjonen var vi i våre fargerike bunader, og det klikka i smarttelefonar langs heile ruta. Den broderte, bunadsinspirerte dåpskjolen fekk også mykje merksemd etter gudstenesta.

Heime venta eit festpynta telt.

For å gjere teltet koselegare, kappa eg ned og kvista ei høg bjørk, som fekk henge frå midtstanga i taket. Bjørka vart pynta med vimplar, mellom anna dei fine, hekla vimpelrekkene, papirgirlanderkuler (eller kva det heiter), og diverse andre dekorasjonar.

På borda sette eg haustlege bukettar av solsikker, kvite roser, klatrehortensia og rognebær. I tillegg lyste batteridrivne lyslenker med sommarfuglar mot gjestene.

Det blir sjølvsagt ikkje fest hos oss utan våre trufaste «blondedukar» og linserviettar. Denne gongen fekk dei følge av søte serviettar med meiser og revar.

Har du lyst på meir inspirasjon, kan du sjå dukane og linserviettane i aksjon i innlegga «Dåpen til ein liten gut«, «Vinterdåp for gullguten og «Eit jonsokbryllaup i havgapet«.

I augustdåpen serverte vi betasuppe og flatbrød. Sidan familien har løkallergi, sette vi fram skåler med valfritt garnityr: grasløk, vårløk, løpstikke og persille.

I tidlegare dåpar har vi servert rømmegraut og løkfri festbuffé.

Alkoholfri velkomstdrink må til i dåp. Dette er ein sommarleg kvit sangria.

Endå enklare er det å lage prinsessebrus eller alkoholfri mimosa. Er det vinter og kaldt, er det topp med kvit gløgg.

Invitasjonane fann eg inspirasjon til på Pinterest. Blå hjarte er klippa ut av kunstverk storebrødrene til dåpsbarnet måla i barnehagen, og limt på eit kort med tjukt, dobbelsidig limband. Ein stump restegarn er vikla rundt til slutt.

Ein gild dag for oss alle, og no er dåpsfeiringskarriera mi ugjenkalleleg forbi.

–Snella–

 

Reklame

Read Full Post »

Eldar Elefant

Tidlegare i år blei Snella sin Skjønnas døypt. Litt på etterskudd fekk eg sendt avgårde dåpsgåva. Storebror Fikslein fekk ein sjiraff til sin dåp, og då tenkte eg det passa godt med ein elefant til veslebror.

Så her kan eg altså presentere Eldar Elefant.

Eldar Elefant

Litt skakk i øyrene, men elles i god form.

Eldar Elefant

Mønsteret finn du i Tildas Atelier. Elefant er det første gong eg har laga, men sjiraffar har det blitt fleire av. Treng du meir sjiraffinspirasjon har eg laga ein frøkensjiraff og Snella frøken Viktualia tidlegare.

– Nøstet –

Read Full Post »

Vinterdåp for gullguten

*

Januardagen rann med minusgrader og melisdryss over den vakre gamle kyrkja ved fjorden. Den første snøen i år kom medan vi sov, løynleg som på kattafot skjulte han den triste hagen, gammalt lauv og rubb og rot. Perfekt dåpsdag for vår vesle Skjønnas!

*

*

Gudstenesta var vakker, med stor vekt på dåpshandlinga og tidenes kortaste preike. Godt tilrettelagd for alle med små born, med andre ord. Og skatten var flott i den bunadsinspirerte dåpskjolen sin.

Og så var det fest med 32 gjester i vårt vesle hus. Først fekk gjestene ein varm alkoholfri velkomstdrink, eplegløgg, så dei fekk varmen igjen. Eg kokte råsaft av eple i haust, men det går fint an å bruke vanleg eplejus. No varma eg safta opp med fersk ingefær, vaniljestang, kanel, sitronskiver, nellik og litt honning. Du finn andre oppskrifter på kvit gløgg her, og to gode kalde alkoholfrie velkomstdrinkar her (prinsessebrus) og her (mimosa).

*

*

Sidan det er kaldt ute og vi har kalde fargar i stova, ville eg gjerne trekke inn litt varme fargar frå naturen til dåpsbordet.  Valet fall på store raude roser og litt mindre kvite og champagnefarga roser i høge og låge glasvasar og flasker.  Stearinlysa har ulike fasongar, men alle er i naturfargar. Og lysa funkla i nypussa stakar i messing, tinn, stål og glas.

*

*

Eg har dekka med dei same linserviettane og dukane som i bryllaupet og i dåpen til eldstemann. Serviettane bretta vi slik at dei skjuler tallerkane, som er i ulike fargar og storleikar, for å få eit meir harmonisk bord.

Konglene har storebror og eg henta i skogen. Dei har fått tørke ei stund, og så har nokre av dei fått ein makeover med resten av sølvsprayen etter adventsstaken.

*

*

*

Her er ein detalj frå bordet, med telys med ugle kjøpt i Binz i sommar:

*

På menyen stod tradisjonell norsk festmat, nemleg rykande varm rømmegraut med klassisk tilbehør: rikeleg spekemat, rosiner, morfars heimebakte flatbrød, vasskringler, feitt, sukker og kanel.  I tillegg hadde vi eit eige bord for dei som heller ville ha pølser:

*

Dette bordet var dekka med sølvserviettar bretta etter mønstra lilje, pil, slips, bispehatt, vifte og diamant. Lysestakane er raudvinsglas snudd opp ned med ei rose under:

 *

*

Og etterpå var det sjølvsagt stort vestnorsk kakebord med sju slag: kransekake, suksessterte, ostekake med jordbær, tropisk aroma, mandelmokkakake, løpser (lefser) og supersuksessen blant dei minste gjestene, uglemuffins!

*

Vi hadde ein flott dåpsdag! Og no er det endå eit godt minne knytt til dåpskjolen og bunadene.

*

–Snella–

Read Full Post »

Dåpen til ein liten gut

I dag står det eit tent dåpslys på bordet hos oss. Det er akkurat eitt år sidan Fikslein vart døypt, og det feirar vi med å tenne dåpslyset hans og ein diger stabel med vaflar. Då passar det òg å blogge litt dåpsinspirasjon og bilete av dåpsbordet.

Temaet for dåpen var tru, håp og kjærleik, symbolisert med kors, anker og hjarte, og det ville eg skulle vise i bordpynten. Raudt, kvitt og blått passar til ein vårdåp, for eg ville ikkje ha eit altfor søtt bord. Derfor er det mykje mørkeblått og berre litt lyseblått (i perler, sommarfuglar, telys og forglemmegei).

*

Bordpynt – tru, håp og kjærleik

*

Eg laga anker av kvistar, surra med ståltråd med lyseblå perler på, måla trefarga hjarte frå Panduro mørkeblå og limte sølvfarga konfettikors på. Konfettikorsa er dei same som eg brukte på dåpsinvitasjonane. Dukane er gjenbruk frå bryllaupet.

*

Bordpynt – hekla blomster og anker

*

Fordi eg hadde litt passande restegarn, hekla eg nokre blå blomster med grøne blad. Det vart gjort på frihand, men blomsten i dette mønsteret er ganske lik.

*

Dåpskuvert – serviett med anker, linserviett og marsipanhjarte frå Niederegger

*

Kuverten er i raudt, kvitt, blått og lin. Eg hadde gitt opp å finne serviettar med anker på og hadde vaska og strøke dei fine linserviettane mine då det dukka opp ein pakke med perfekte serviettar i ein lekker interiørforretning i Stavern. Altså måtte det bli begge delar – og små raude marsipanhjarte frå Niederegger.

*

Dåpsoppsats med roser og forglemmegei

*

Dåpsoppsats med bamse og roser

*

Blomsteroppsatsane laga vi med kvite roser, bjørkekvistar og forglemmegei. Den i midten er høgst og (nokolunde) rund, medan dei på kvar side er meir avlange og har bamsar.

*

Dåpsbord for ein liten gut

*

*

Dåpslyset fekk stå og skine på dåpsbordet. Her rett etter velkomsdrinken og før vi opna festbuffeen.

*

Dåpspynt – bjørk og sommarfugl

*

Vi hadde eit eige rom der vi serverte velkomstdrinken. Der hadde vi ein prosjektor som viste bilete av dåpsbarnet, og vi hadde sett inn leikar til dei minste gjestene og blåst opp ein haug med ballongar og badeballar. Veldig populært!

*

Velkomstdrink med bær

*

Vi serverte ein alkoholfri velkomstdrink, som du finn oppskrift på i dette innlegget.

*

Dåpspynt – norske flagg og bjørk

*

Dåpen hadde vi i eit kult kontorlokale, som trengte litt hjelp for å blir dåpsfähig. Ein rask sjekk viste at det ikkje var bjørkepollen i lufta lenger, så eg valte å raide hagen til svigers til nokre store oppsatsar med flagg.

Dåpsbarnet hadde fått ein brodert, bunadsinspirert dåpskjole til seremonien, og den fekk henge framme i lokalet til pynt. På festen hadde han på seg den fine nye matrosdressen med anker og stjerner.

I innlegget «Vinterdåp for gullguten» kan du finne meir dåpsinspirasjon.

–Snella–

Read Full Post »

Bella, bella – yndig strikkakjole til kusina

Om kort tid er det dåp for den vesle kusina, og ho må få ei flott gåve. Ei lita sølje er obligatorisk, og kva er vel betre enn å gje ho vekk på ein søt kjole?

*

*

Bellamønsteret frå boka «Babystrik på pinde 3» av Lene Holme Samsøe er populært her i bloggosfæren for tida, så eg tenkte eg ville prøve ein tunika til jente.Kusina fekk jo havskumteppe då ho var fødd, og eg fekk lyst å følge opp med kjole/tunika i same garn i ein litt lysare farge: Drops BabyAlpaca Silk i 3250 lys gammalrosa.

*

Bellatunika

*

Dette var ikkje det enklaste prosjektet. Berestykket skal strikkast fram og tilbake, og det var ikkje lett å få det pent og jamt med dette glatte garnet. Takk og lov for dampstrykejern! Det planlagde babyteppet i same mønster og garn (i fargen 4088 lyng) utgår definitivt. Vi får sjå om eg kan finne ei betre teppeoppskrift. Følg med, følg med. (Oppdatering i august: Her kan du sjå korleis teppet vart!)

Nedst er det fire riller. For å gje kjolen eit hint av glamour strikka eg nest siste rille med Anny Blatt Tresor 1141 Pale blush innkjøpt på siste Berlintur. Garnet er så lekkert! Paljettane gjer det perfekt til små detaljar. Det bør nok vere minst to omgangar med garnet for at det skal bli ordentleg glitreeffekt.

*

Detalj: ei rille i Anny Blatt Tresor

*

Om dette vart ein bellakjole eller ein bellatunika, er eg usikker på. Etter mønsteret er dei like lange. Eg ville ikkje ha knappar, så eg følgte tunikamønsteret. Men under monteringa skjønte eg ikkje korleis det kunne bli fint, så eg strikka på knappestolpar (på baksida) etter kjolemønsteret, men laga berre to knapphol:

*

Kjolen er strikka i str. 18–24 mnd, så han er nok passeleg når desemberfestivitasen tek til. Kanskje også dei skjønne harpustøflane passar enno då. Det er iallfall perfekt match!

-Snella-

Read Full Post »

Prinsessebrus – alkoholfri velkomstdrink

Treng du ei enkel og god oppskrift på alkoholfri velkomsttdrink i dåp eller andre lag?

Vi blanda Funlight jordbær- og rabarbrasaft med Farris og hadde oppi frosne bær istadenfor isbitar.

Etter ei stund tar bæra til å tine, og det dannar seg «silkeband» i drinken.

Ei av dei yndige gjesteprinsessene i dåpen døypte drinken prompte for «prinsessebrus» og gulpa likegodt ned fire glas på styrten.

Konklusjon: Fem av fem prinsesser tilrår «prinsessebrus». Friskt, raskt, lettvint, stilig og godt.

Eit anna alternativ er alkoholfri mimosa.

– Snella –

Read Full Post »

Bunadsinspirert dåpskjole

Snella og Nøstets siste fellesprosjekt er dåpskjolen til Fikslein. Ønsket var ein tradisjonell kvit kjole med litt bunadspreg.

Kjolen er sydd etter grunnmønsteret 83001 Dåpskjole frå Stoff og stil. Den var relativt enkel å sy, og stoffet var greit å sy i og veldig lett å stryke. Sånn såg kjolen ut når den var sydd etter mønsteret.

Dåpskjole etter mønster

Ein veldig fin dåpskjole, men det mangla det lille ekstra. Så ved å sette sammen delane på skjørtet til kjolen og kutte det i lengda, så laga vi eit mønster til kappa. Stoffet til kappa var tynt, gjennomsiktig og lett. Eit stoff som «levde» når ein tok i det. Ei skikkelig utfordring å jobbe med. Når det blei sydd i, drog symaskina med seg trådar i stoffet, omtrent som når ein tråd hektar seg i noko på ei nylonstrømpebukse. Men det fins alltid ei råd!

Til symaskina fins det mange ulike nåler. Dei fleste har vel høyrt om nåler til skinn og denim. Men det fins enda fleire. Blant anna ei som heiter kulespissnål. Eller jerseynål som nokon kallar den. Denne nåla er runda på ein anna måte og har eit anna spor framme på spissen som gjer at den ikkje drar med seg trådar i stoffet. Den er smart å bruke på blant anna «strikka stoff» som jersey, men fungerte òg utmerka på dette tynne stoffet.

Vel, som bileta under viser, så måtte det mange nåler til for å kontrollere stoffet. Den største utfordringa i forhold til mønster var å få ein fin boge under armen. Sidan det var så lite hald i stoffet, valte eg å legge inn eit skråband. Dette gjorde òg at det blei enklare å sy kappa fast til kjolen etterpå.

Dåpskjole

Til broderia har vi brukt mønster frå trysilbunaden og laga vår eigen kombinasjon. Takk til Husfliden i Trysil for at mønstra ligg ute! Blomsterrankane er brodert på same stoff som dåpskjolen og sydd på kappa. Vi valte å bruke brodergarn i to lillafargar, grønt, to gråfargar og svart. Mønsteret er teikna på med tusj som forsvinn i kaldt vatn.

Som på ein bunad er ei sølje prikken over i-en på denne dåpskjolen.

Her kan du lese innlegg om dåpsfesten, den løkfrie festbuffeen, den alkoholfrie velkomstdrinken og ein annan alkoholfri velkomstdrink.

– Snella og Nøstet –

Read Full Post »

Matrosdress til baby

Som lita hadde eg ein raud matroskjole, og Nøstet hadde ein kvit. Eg kan hugse at eg kjente meg så fin i den kjolen. Derfor var det soleklart at Fikslein måtte få matrosdress til 17. mai og dåpen. Eg valte det fine mønsteret til Dale. Buksa har eg strikka utan dei kvite stripene og med vrangbord nederst slik at pjokken kan bruke den litt lenger og i andre samanhengar.

 

Eg fann fine knappar med anker på på Bentes boutique på Sagene – ein spesielt fin detalj sidan det i tillegg til det maritime symboliserer håp. Dåpen har, som kjent, temaet «tru, håp og kjærleik»!

 

Min vesle matros har dessutan fått ekte marineuniformstjerner på kragen. Eg trur kanskje ikkje desse blir brukte lenger, for dei er å få kjøpt på den koselege museumsbutikken på Karljohansvern i Horten.

 

 

–Snella–

Read Full Post »

Det ventande livet

… for dagen er du,
og lyset er du,
sola er du,
og våren er du,
og heile det vakre, vakre,
ventande livet er du!

Karin Boye

Å vere heime med ein flunkande ny verdsborgar er stort og skummelt, skjønt og skremmande, sterkt, surrealistisk og supert på éin gong. Eg smeltar av eit smil, tårene siler når eg blir rørt, og livet kjennest litt større.

Og så så mykje fint ein kan strikke og sy til slike småtroll! Eg er så imponert over alt det flotte folk viser fram på bloggane sine. For tida leitar eg etter dåpsinspirasjon, og det er visst ikkje grenser for kreativitet. Takk til alle som delar! Eg lovar å legge ut bilete og eventuelle lure tips og idear når den tid kjem. Status så langt er at dåpskjolen – eit samarbeidsprosjekt mellom Nøstet og meg – er nesten ferdig. Det kjem sjølvsagt eit eige innlegg om den.

Invitasjonane er også sendt. Temaet for dåpen er «tru, håp og kjærleik», og til det synest eg det passar med enkle og reine invitasjonar.

–Snella–

Read Full Post »