Hekla dukketeppe i retrostil

Når ein har tre små gutar, er det berre å omfamne alle dei små veninnene så ein får utløp for dei ibuande behovet for å lage søte jentete ting. I treårsdagen til besteveninna troppa Fikslein opp med eit pusete dukkevognteppe i gåve. Teppet er ein minivariant av vognteppet mormor hekla til meg seint i 70-åra.

Heklefakta
Mønster: «Vognteppe i Rosett», frå Dale garn
Lappar: 24 stk (4 i breidda, seks i lengda)
Garn: Restegarn, mellom anna arvegarn. Grått i midten, fleirfarga lilla (også sett i den hekla ugleputa), og naturkvitt. Kanten rundt teppet er hekla med krepsemasker i rosa pusegarn.
Heklenål: 3,5
Trådar å feste: 154

Litt krampe i armen til slutt, men verd det. Storleiken vart testa i vogga til veslebror.

–Snella–

 

Reklame

Read Full Post »

Alle gode ting er tre

Og eit så flott mønster kan vel ikkje strikkast for ofte? Eg snakkar om Umaro, det flotte pleddet designa av Jared Flood. Snella har laga ei nydeleg og delikat utgåve i babyull til ein ny verdsborgar og eg har strikka ein grovare versjon i Nepal til ei veninne som hadde rund dag. Det tredje pleddet er Umaro i dukkestørrelse. Heilt ærleg blei det nesten for lite som vognteppe til Snuppa si dukkevogn. Mønsteret lurte meg litt når eg rekna på bredda, sidan fletta trekker det saman ein del.

Eit bittelite Umaroteppe

Teppet er strikka i enkel tråd babyull og eg trur det var pinne nr 3. Eg strikkar som ein kan sjå svært fast, av og til så fast at krampa tar meg. Nokon gongar slår eg til med tjukkare pinnar enn det som er foreslått på garnet, men i underbevisstheten ligg bestemor si stemme om at det ikkje må bli for laust for det er ikkje pent…. Eg har vel eit stykke igjen før det blir for laust, så der får eg øve meg litt.

Samme mønster – ulikt garn!

– Nøstet –

Read Full Post »

Nydeleg kappekjole til dukka

Nok ein jentebursdag stod for tur, denne gong til nok ei niese. Ho hadde eit par veker før sendt inn ønskeliste med dukkekle øverst, og gjerne kjole. Det burde vere grei skuring for tante med eit velfylt garnlager. Dukkeheftene blei leita fram og det samme blei kassen med bomullsgarn. Eg liker å prøve nye oppskrifter og fann ein kappekjole i 1207 dukke frå Sandesgarn (side 5) som såg fin ut, i bomullskassen fann eg nokre nøster med Safran som passa fint.

Kappekjole til Babyborn

Ei helg på besøk hos ei veninne inkluderte masse strikketid, så sjølv om det var mykje arbeid på kjolen gjekk det greit å bli ferdig i tide. I samme heftet (side 8) fann eg ei jakke som kunne passe til.

Jakke og kappekjole til Babyborn

Niesa blei strålande fornøgd, og det blei eg òg. No nærmer det seg Snuppa sin dag, og det er klart ho må få litt dukkekle òg. Kanskje skal eg prøve å sy dei denne gongen, og i tillegg har eg lagt opp til eit dukke-Umaroteppe.

Meir dukkekleinspirasjon finn du her.

– Nøstet –

Read Full Post »

Heilt på etterskot

Plutseleg var det 2014, men eg er framleis på strikkelista for 2013. Ambisjonane før jul var som vanleg alt for høge. Eg såg kjapt at eg ikkje rakk raggsokkar til den yngste broren min (som eg har lova at eg skal forsyne han med jevnleg). Så han fekk eit gåvekort på sokkar og fekk innløyst gåvekortet tidleg i romjula.

Raggsokkar

Som ein kan sjå feilberegna eg mengda garn, men sidan dette er arbeidssokkar spelar det lita rolle. Og det blir så mykje ryddigare i garnkassa når den eine fargen blir brukt heilt opp før ein startar på den neste.

I forrige veke leverte eg ut den siste julepresangen. Niesa var vekkreist i jula og skulle få presangen i romjula, men ikkje eingong den fristen greide eg å halde. Uansett var gleda stor då ho fekk pakke opp litt uti januar.

Babyborn dukkekle i Viking Bjørk

Oppskrifta fann eg i Allers Høststrikk 2013. Eg har strikka i Viking Bjørk som eg har masse av, det var visst eit lite sal på den lokale Husfliden ifjor. Eg blei ikkje så veldig imponert av garnet, så det kan vere at det blir mykje dukkekle i desse fargane framover.

I tillegg til dukkekle fekk niesa sengetøy til dukkevogna si. Eg sydde med det samme uglestoffet som Snuppa fekk til si dukkevogn ifjor.

No strikkar og syr eg vidare på 2013-lista. Snella får snart ei forsinka bursdagsgåve i posten, og saman med den kjem det nok samtidig ei forsinka dåpsgåve til den minste Snelleguten. Men SÅ er eg klar for 2014!

Godt nytt år alle saman!

– Nøstet –

Read Full Post »

6 veker til jul!

Ja, no nærmer det seg jammen jul! I nøsteheimen er julekorta bestilt og ein del av kjøpegåvene er i hus. Adventstida skal i år nemlig brukast til koselegare aktivitetar enn å springe rundt på butikkar. Ein del av dei heimelaga gåvene er òg ferdige. Eine niesa ønska seg kle til Babyborndukka si, og det er det klart at tanta kan fikse.

Babybornsett i Smart

Litt over eit nøste med knall rosa blei til kjole/lang genser, ei alpehue og eit par sokkar. Eit påbegynt nøste med gult blei ribbestrikka tights. Oppskrifta var eigentleg ei strømpebukse, men etterkvart som eg kom nedover beina innsåg eg at det ikkje var nok garn. Heldigvis var det nok til at tightsen blei lang nok. Oppskriftene finn du i Sandnes 1207 dukke.

Treng du meir inspirasjon til dukkekle har eg skrive meir om det i eit tidligare innlegg. Det er masse flotte kle som kan strikkast av små rester garn. Eg skal strikke minst eit sett til før jul.

– Nøstet –

Read Full Post »

Guttekle til dukka

Denne helga fyller niesa 8 år, og ho har ønska seg kle til guttedukka si. Det er klart tanta kan strikke guttekle. Bokhylla inneheld både bøker og hefter med dukkekle, og dette settet er blanding av to ulike sett i boka «Strikk koselige klær til dukken» av Målfrid Gausel. Oppskriftene i bøkene hennar er verkeleg flotte og ser ut som skikkelige babykle. Tidligare har eg strikka masse dukkekle, men då helst frå heftene til Sandnes Garn.

Babybornguten

Eg har strikka det i Dale Babyull som var i garnlageret og hadde nesten nok. Strikkeveninna som òg har garnlager var god å ha, og dukka opp med litt kvit babyull sånn at buksa blei ferdig.

Bukse med vaffelstrikk

Mønsteret på brystdelen av buksa er forresten noko av det flottaste eg har sett.

Vaffelstrikk

Vaffelstrikk må eg huske å bruke i andre prosjekt!

– Nøstet –

Read Full Post »

1 veke igjen til jul – julegåvetips

I dag er ei veke att til julaftan. Stressa? Du rekk fint å lage fine, heimelaga julegåver enno. Når det er ro i huset og du har fått beina på bordet og litt gløgg i koppen, kan du kose deg med å lage desse fine gåvene.

Til kjærasten: Strikk ei god hue, som denne frå Garnstudio. Det blir han nok glad for så kaldt som det har vore i det siste. Er din kjære av den leikne typen, kan hua få ein diger dusk. Det er jo så populært for tida.

Til veninna: Eit par vottar i Eskimo-garn går superkjapt. Særleg pene er dei i utgangspunktet ikkje, men du kan pynte og style dei så det blir ei artig, omtenksam og personleg gåve. Sjiraffentusiastveninna får sjølvsagt sjiraffvottar (sjå biletet øverst til venstre).

Dei to gåvene vi fekk mest overstrøymande tilbakemeldingar på i fjor, er dei du rekk å strikke på ei veke. Det lette sjalet i patenststrikk ser eg i bruk titt og ofte. Veninna som fekk tøflane i Eskimo og Puddel, kallar dei «gåborttøflane» sine. «For med sånne tøfler trenger jeg ikke å ha med pensko!»

Til hjarteknusarane: Kle til dukke eller bamse. Settet på biletet nede til høgre finn du gratis på Sandnesgarn sine nettsider. Der finn du òg dette heftet gratis. Meir inspirasjon kan du finne i eit tidlegare innlegg på bloggen.

Til pus og vofsen: Nissehue, så klart!

– Snella og Nøstet –

Read Full Post »

Nytt til Barbie

Snuppa har akkurat begynt å interessere seg for Barbie. Eg har difor strikka to kjoler som ho får i adventskalenderen sin. Kjolane fann eg oppskrift på i Alt om Julen frå 2006 då eg såg etter juleidéer i julebladsamlinga mi. Har du ikkje bladet kan du finne over 1000 Barbiekle-oppskrifter på «Sticka til Barbie».

Barbie-kle er ein kjempefin måte å få strikka opp restegarn og noko det snåle og syntetiske effektgarnet som på merkeleg vis har havna i garnlageret. Det kjem nok til å komme fleire kreasjonar etterkvart.

Denne raude fluffy kjolen er strikka i Lanett og Funny, og her er Barbie verkeleg klar for julefesten.

Barbie klar for julefest

Skal ho derimot på julebord er det kanskje kjekkere med ein kortare variant. Denne er strikka i Arista frå Anchor og «pelskanten» nederst er i Funny.

Barbie klar for julebord

Snuppa har foreløbig berre opna pakken med den svarte kjolen. Ho kom springande til meg strålande fornøgd og kunne fortelje at ho hadde fått ein bandasje med glitter på i kalenderen. «Ein sånn ein eg kan bruke viss eg knekker armen, mamma!» Vel, vi får vel håpe at Barbie får meir bruk for den…

– Nøstet – 

Read Full Post »

Dukkekle

Dukkekle er ypperleg for å redusere garnlageret. Det går ikkje så mange gram på kvart plagg, og dei er ikkje så opptatt av kva farge dei får. Akkurat i dette tilfellet hadde eg nesten akkurat dei fargane som stod i oppskrifta (som du finn i Sandneshefte 0106), og heile settet blei ganske flott om eg skal sei det sjølv. Utfordringa på dette settet var at eg måtte strikke med fleire fargar på ein gong, både på retta og vranga. Absolutt ikkje favorittgreina i strikkefaget, men noko eg bør fortsette å øve meg på. I tillegg skulle det vere glidelås på dressen, og det har eg aldri prøvd å sy i eit strikka plagg før. Etter tredje forsøk blei eg fornøgd nok, sidan det er til ei dukke. Så no kan dukka vere med ut om det er kaldt. Mulig ho blir litt kald på beina, men det får eg ordne ein anna kveld.

Dukkedress strikka i Smart

Dukkene til Snuppa begynner å få ei variert garderobe. Her er nokre av dei heimestrikka plagga.

Dukkekle

–Nøstet –

Read Full Post »