Feeds:
Innlegg
Kommentarar

Posts Tagged ‘norsk’

Nøstet har feira rund dag! Hurra og gratulerer! Ein så skjønn skapning måtte få ei heilt spesiell gåve. Sidan ho er glad i bunaden sin og til og med kan sy sjølv, vart det to bunadshårklyper i spesiallaga oppbevaringspose med perlemønster. Posen er ein variant av eit pulsvarmarmønster til bunaden vår frå Sunnfjord.

bunadsharklyper-og-smykkepose-med-perler

Strikkefakta
Mønster: Modifisert versjon av pulsvante frå Dale i Sunnfjord, henta frå Magasinet BUNAD, som igjen har henta oppskrifta frå boka Håndplagg til bunader og folkedrakter av Heidi Fossnes, Damm 2003. I oppskrifta blir  framgangsmåten godt forklart.
Garn: Naturkvit og lavendelfarga babyull
Pinnar: 2,5
Perler: Skimrande småperler i nyansar av lilla, gull, grønt og blått. Du treng òg ei tynn nål og sytråd til å få perlene over på strikkegarnet med.

Eg har lagt opp ti masker meir enn oppskrifta seier. Holrada til den tvinna strammetråden er laga med eit kast og to rett saman på kvar sjette omgang ti masker frå kanten. Til slutt er posen sydd igjen.

strikka-smykkepose-med-perler-til-bunadssolv

-Snella-

Read Full Post »

Er du godt igong med julegåvene? Begynt å stresse litt allereie? Fortvil ikkje, her er eit godt tips! Er det noko alle treng, så er det ein god og varm hals.

img_0108

Strikkefakta:

Mønster: Perlestrikket lang hals med snurr av Marte Helgetun – gratisoppskrift

Garn: Sandnes Mini Alpakka Tweed, farge grå, dobbelt garn

Pinne: 5,5 mm

Garnmengde: 191 gram

Finn nokre nøster mjukt garn i rett tjukkelse og strikk perlestrikk så lenge du har garn og tid. Har du tjukkere garn blir det ein grovare struktur og det går fortere å strikke. Marte Helgetun har fleire gratisoppskrifter på halsar med ulik struktur og garntypar, så ein kan finne noko for ein kvar smak.

 

Sånn, då er det berre å sette igong!

 

Nøstet-

 

 

Read Full Post »

Plutselig var det 2016, og det er over eit år sidan vi publiserte forrige innlegg. 2015 viste seg å bli eit travelt år for både Snella og Nøstet, og blogging var ein av aktivitetane som måtte vike. Vi satsar på at 2016 kan prioriterast annleis og at blogging kjem høgare opp på lista.

Handarbeid blei heldigvis ikkje lagt vekk i 2015. Det blei både strikka og hekla ein heil del, og på tampen av året sneik det seg inn eit syprosjekt.


Eit av dei største prosjekta mine i 2015 var Primulapledd, eit design frå Arne og Carlos som ein finn i boka Handarbeid i hagen. Gratis oppskrift på pleddet kan du finne her.

Ei god venninne gifta seg, og det var på sin plass med ei flott bryllaupsgåve. Eg hekla pleddet i dobbel Drops Alpaca, og valgte eit stort fargespekter. Eg prøvde å sette saman fargane sånn at det ikkje skulle bli to like blomster. Og når dei skulle heklast saman prøvde eg å unngå blomstrar med lik farge ytterst ved sida av kvarandre. Om alle blei ulike er eg usikker på, men det er i allefall ikkje mange det fins to av.

Eg hekla først to omgonger på alle blomstrane, og så hekla eg dei saman på tredje omgong. Eg har latt vere å hekle halve blomster til kortsidene, og hekla kanten rundt med stavgrupper i passe avstand.

Som alltid etter eit sånt prosjekt lovar eg meg sjølv at det skal bli lenge til neste gong. Og det blei ei stund, men no er eg jammen igong med eit nytt pledd igjen. Ikkje samme type mønster, men i samme garn.
– Nøstet –

Read Full Post »

Nokon gongar startar prosjektet med at ein finn eit mønster ein berre MÅ prøve. Andre gongar, som i dette tilfelle, var det garnet som lokka. Oftare og oftare kom eg over fine ord om Shetland Soft, og når haustgarderoben til Snuppa skulle planleggast fann eg ut at det var på tide å teste ut dette garnet. Inne på nettbutikken til Malsen og Mor blei eg overrumpla over alle dei flotte fargane! Kva skulle eg velge? Første plan var å strikke prikkejakke frå Lene Holme Samsøe, eg hadde lilla Nøstebarngarn som eg tenkte eg kunne bruke til kantfarge og grønt til prikkar. Kanskje oransje til bunnfarge? Jau, den såg flott ut. Men så var det jo så mange andre fargar. Den turkise var skikkeleg flott (og nevøen skal jo ha julegåve), og når eg såg mønster på Lommegenser havna både mønster og garn i handlekorga på eit blunk. Kort tid etter låg det i postkassa.

 

Lommegenser

Lommegenser til nevøen

Lommegenser, turkis og brunt tok eg med meg på ferie i sommar. Sjølv om garnet var seigt og klissete og det lukta sauefjøs, så var lommegenseren eit veldig kjekt prosjekt som gjekk superkjapt å strikke. Så kjekt var det at når eg kom heim og fann ut at det nydelege oransje garnet ikkje passa med det grøne til prikkar, heiv eg meg rundt og strikka ein lommegenser til.

 

Lommegenser

Lommegenser til Snuppa

Men så skjedde det som av og til ofte skjer. Det blir kjekkere å starte på eit nytt prosjekt enn å fullføre det gamle. Så dei to lommegensarane blei liggande med lause trådender og framleis stive og klissete. Lenge. Heilt til i forrige veke då det plutseleg blei så kaldt at det måtte tjukkare gensere med i barnehagen. Ein liten time med trådfesting, ei runde i vaskemaskina med Milo og vips var to deilige, mjuke gensere klare for bruk.

No har eg høyrt at Shetland Soft blir solgt ferdig vaska, så det blir nok fleire bestillingar etterkvart!

 

– Nøstet –

Read Full Post »

Det er haust i lufta, og då kriblar det ekstra mykje i strikkepinnane! Samstundes flaumar det over av inspirasjon, både på bloggar, instagram og i nye bøker. I tillegg har eg alltid ei liste liggande over plagg eg har lyst til å strikke.

For ungane treng jo varme kle til skule og barnehage, det er alltids kjekt med ei ny hue eller tre, og skal ein gje strikka julegåver kan det vere kjekt å komme igang tidleg.

Allereie i sommar kom eg igong med haustplagga. Ja, det blei fleirtal. Det var masse kjekke prosjekt å starte på, og ingenting som hasta å gjere ferdig.

 

UFO-haug

UFO-haug

Så no sit eg med denne haugen av UFO-ar. Frå botnen kan eg presentere Mariushettejakke str 10-12 år, må klippast opp, sy på ermer, strikke hette og kant og montere glidelås. Nr 2 er nok ei Mariushettejakke, denne i str 8-10 år, og samme arbeid gjenstår. Vidare ligg det ein lommegensar som manglar halskant og montering. Neste plagg er også ein lommegensar som er ferdig strikka, og berre manglar trådfest. Nedst øvst ligg ein tunika til meg sjølv som eg starta på den helga Fikslein blei døypt for eit par år sidan, den blei tatt fram igjen denne helga. Og øvst ligg ei snoningstrøje som manglar knappar. Mottakaren blei fødd i forrige veke, så den må prioriterast.

 

Heldigvis har forfattarane vore meir kreative med innhaldet enn titlane på bøkene.

Heldigvis har forfattarane vore meir kreative med innhaldet enn titlane på bøkene.

Men som alltid fristar det meir å sette igong med eit nytt prosjekt. Nokre nye bøker har det blitt, og strikkelista auka betrakteleg etter å ha bladd litt. Den nye Nøstebarnboka kjem nok til å bli ein klassikar som den forrige, Charlott Pettersen si bok «Strikk til mamma og mini» var ei god investering, i «Strik til banditter» av Signe Strømgaard har Snuppa plukka ut eit par tunikaer som står på ønskelista og i Marte Helgetun si bok er det mange fine idèar til plagg eg kan strikke til dei små eg kjenner.

 

Hos Paelas fristar Flora-toppen og huene til Klompelompe kan passe til dei fleste små hovud. Og så har sjølvsagt dei store garnprodusentane komme med nye mønster og nokre òg med nye spennande garntypar. Det er berre å velge og vrake i mønster og garn!

 

Kor finn du inspirasjon for tida?

 

– Nøstet –

 

 

Read Full Post »

Ein gong i tida var eg svært fasinert av fleirfarga garn, og spesielt i tynt sokkegarntjukkelse. Eg var i startfasa av å bygge meg opp ein garnlager, og det blei med eit nøste heim kvar gong eg kom over ei tilbudskorg eller såg ein fargekombinasjon eg likte. Antall nøster inn stod ikkje i stil med antall sokkar ut. Innimellom, for å sjå om fargane var like fine strikka som i nøsteform, blei det strikka eit sokkepar i barnehagestørrelse. Igjen sit eg med masse halve og enda mindre rester av ein eksplosjon av fargar.

Restefest

Restefest

For eit par veker sidan tok eg med meg masse rester og eit par nøster einsfarga Fabel, pinne 2,5 og sokkeboka til Bitta Mikkelborg på hytta. Tidlegare har eg strikka Søte frøken sommer, no bestemte eg meg for å prøve Bure. I boka var dei strikka i tjukkare garn, men eg la opp det som stod sjølv om eg hadde tynnare garn. Nokon ville dei uansett passe til. Eg parallellstrikka sokkane for å få dei nokonlunde like, og kom i mål med å bruke 3 restenøster av to ulike fargekombinasjonar i tillegg til svart Fabel.

Bure

Bure

Men har du sett? Jammen har eg ikkje klart å forflytte den eine svarte maska som følgjer sokken nedover! Ja, ja, det får berre vere sånn, for det blei ikkje oppdaga før eg såg igjennom bileta.

Sokkane passa Nøstemannen perfekt. Dei blei tatt i bruk umiddelbart og var dei beste sokkane han hadde hatt på seg nokonsinne. Du må gjerne lage fleire, sa han. Jau, fleire blir det. Om det blir til han eller andre er uvisst. Strikkekorga står på hytta og ventar på meg til neste gong eg kjem. Då skal eg prøve meg på nye fargekombinasjonar.

Snopekorg!

Snopekorg!

– Nøstet –

Read Full Post »

Neida, vi skal nyte sommaren ei god stund til håper eg. Men her om dagen kom det skriv frå klasse 5B om at dei skulle representere 1944-1953 i skulen si jubileumsforestilling. Svart tights og genser og ei raud topphue/nissehue uten kvit kant måtte vere med på skulen om ei vekes tid. Den raude topphue blei brukt til å vise motstand mot den tyske okkupasjonen under 2.verdskrig, og det er dette denne klassen skal representere. Det blir veldig spennande å sjå forestillinga. Desverre er det berre 1. og 7.klasse-foreldre som får sjansen no før sommaren, vi andre må vente til forestilling i september.

 

Raud topphue

Raud topphue

Men tilbake til hua. Juleraud Rubin fantes i garnlageret og ved hjelp av ei tidligare strikka hue fann eg ut av 100 masker var passeleg. Strikka vrangbord på pinne 3,5 og gjekk over til glattstrikk på pinne 4 etter nokre centimeter. Prøvde hua på guten innimellom og når den var lang nok felte eg kvar tiande maske. Strikka ein omgang og felte kvar niande, og så vidare til det var så få masker igjen at eg kunne snurpe resten saman. Dusken blei laga på den gode gamle måten med to ringar utklipt i papp. Eg har ein i plast ein eller annan plass, og der ligg den framleis. Dukkar nok opp ein gong, men enn så lenge fungerer det like greit med papp. Hua veg 75 gram inkl dusk og er eit prosjekt som er rimelig fort gjort.

 

– Nøstet –

Read Full Post »

Vi koser oss på hytta! Vestlandet har hatt eit fantastisk veir i det siste og både dagar og kveldar blir tilbragt ute.

 

Sånne kveldar vil vi ha mange av!

Sånne kveldar vil vi ha mange av!

Innimellom blir det litt strikking. Eg held på med Mariusjakker til begge gutane mine. Monteringsvegring gjer at eg strikker begge før eg set igang med klipping og sying av glidelås. Nokre dagar har det vore så varmt at eg har måtte strikke med bomullsgarn istaden. Eit par oppvaskklutar har blitt strikka på hytta, men heklenåla låg igjen heime så kanten rundt får vi ta ein annan gong. Nepalnøsta er ein del av det neste store prosjektet. Både svogeren og svigerinna har runde dagar i år og har invitert til felles feiring i september. Så innan då håper eg at desse og mange fleire nøster har blitt trylla om til eit pledd. Kanskje blir det eit havskumteppe.

Prosjekt på gong

Prosjekt på gong

Late dagar i Nøsteheimen og Nøstehytta altså. Akkurat sånn det skal vere når Vestlandet byr på strålande sommerveir i mai.

 

God helg frå

– Nøstet –

Read Full Post »

Takk for i går, kjende og ukjende strikkevener som var på Strikkeprosalong i Oslo i går eller skulle ønske de var der.

ProsalongEg hadde tenkt å skrive ei lita oppsummering i dag, men det har sjølvaste Pinneguri allereie gjort på fortreffeleg vis. Ho har notert mykje av det same som eg (og jammen er eg ikkje blitt linselus også), så då kan eg jo supplere med eigne tankar.

Arve Juritzen frå Juritzen forlag er ein dyktig forretningsmann som tydeleg var ute etter å lære noko om den kjøpesterke marknaden sin. Han sjarmerte oss med kommentarar som «På 1800-tallet var det menn som strikket. Så tok damene over, og det ble farger og mønster og fint.» Juritzen stilte nokre spørsmål til salen, og eg hjelper han gjerne. Sidan eg ikkje fekk ordet, presenterer eg hermed eit fiktivt intervju:

Juritzen: Hvorfor kjøper du strikkebøker?

Snella: Eg kjøper mønster på Internett, nyt inspirasjonen og bruker gratisoppskrifter. Likevel kjøper eg strikkebøker. Åttebladrose Eg kjøper først og fremst fordi ei bok borgar for kvalitet. I vår tid når kven som helst kan publisere kva som helst, set eg pris på produkt eg veit er gjennomarbeidde og grundig tygde. Det er eit hav av tekst der ute, og kvaliteten varierer enormt. Då er det godt å plukke opp ei god gammaldags bok som eg veit har vore gjennom redigering, og er vurdert, knadd og omarbeidd til ho er funnen verdig å bli foreviga på papir.

Juritzen: Har du strikkebøker hjemme som du ikke har brukt?

Snella: Kva er å ikkje bruke? Har eg bøker eg ikkje har brukt oppskriftene i? Åja! Eg har enno ikkje strikka noko frå yndlingsboka mi, Literary knits, men eg har jo brukt boka likevel. I timesvis har eg kosa meg med bileta og tekstane og blitt inspirert, mellom anna til å lage sjiraffvottane.

Juritzen: Om du har ein idé til strikkebok, må du kunne summere opp temaet i én setning. Hvilken bok vil du selge meg?

Snella: Eg drøymer ikkje om å lage mønster til ei strikkebok, men eg vil gjerne skrive historiene og spinne draumar til bøkene «Strikk art deco» (kanskje Miss Lemon-toppen min kan vere med?) og «Downton Abbey – ladystrikk». I den siste kan dei fine hekla blondehanskane inngå.

 

Pickles lånt frå evidencemagOgså dei imponerande Pickles-jentene deltok på Prosalongen. Dei uttalte seg nøkternt og tilbakelent utan å selje seg inn for hardt. Dei hadde interessante observasjonar som at det no gir status å ha tid og vise det, til dømes ved å strikke. Folk i dag er rastlause og travle og må fylle tida, og så lenge vi strikkar samtidig, kan vi gjerne sjå på tv.

Det er meg i eit nøtteskal! Og Pickles er topp! Vi har brukt fleire av mønstra deira, mellom anna islandsk soloppgangssjal, tøysetopp og babyteppe.

Nokon nemnde at strikkeinteressa kan henge saman med at vi higar etter noko terapeutisk. For meg vart det bokstaveleg då Juritzen lodda ut den populære boka «Guttestrikk» av Charlott Pettersen. Dama framfor meg vann. Ho viste seg å vere strikketerapeut frå Holtet, hadde sjølv ein 18-åring og håpa det vart ei stund til det kom barnebarn, så ho ga boka til meg. Det var fantastisk hyggeleg gjort, og eg garanterer at dei to pjokkane mine skal få nyte godt av boka! Tusen takk!

Takk til NFF for eit godt initiativ! Det var min første kveld utanfor huset sidan minstemann kom til verda, og eg håpar det blir skapt fleire slike møtestadar.

Snella

Read Full Post »

Jada, nok ein vest. Og denne gongen eit heilt nytt mønster. Dale garn har komme ut med nye hefter og i baby 298 fann ein skjønn rosa vest på ei jente. Sidan eg ikkje har noko lita jente å strikke til for tida, måtte eg lage ein guteversjon som eg kunne sende til Snella sin Skjønnas. Eg hadde igjen beige og gul alpakka frå Leftie som eg strikka før jul, og fann to blåfargar som eg truleg har hatt ein anna plan for ein gong. Akkurat passe mykje mønster for meg som framleis har litt mønstervegring innimellom, og eit kjapt prosjekt gjort unna på ei nokre kveldar. Eg strikka den med maskeantall til str 1 år, og litt kortare lengde sånn at den skulle bli ca str 6-9mnd.

Trekantar i tre fargar

Trekantar i tre fargar

Knappane er dei siste frå ein tur innom Nøstebarn for mange år sidan. Ein god grunn til å stikke innom neste gong eg er i nærheten, for sånne små knappar som skiftar litt farge i ulikt lys passar til mange prosjekt. Perfekt å ha i lageret.

Knappar frå Nøstebarn

Knappar frå Nøstebarn

– Nøstet –

Read Full Post »

Older Posts »