Feeds:
Innlegg
Kommentarar

Posts Tagged ‘Nøstebarn’

Det er haust i lufta, og då kriblar det ekstra mykje i strikkepinnane! Samstundes flaumar det over av inspirasjon, både på bloggar, instagram og i nye bøker. I tillegg har eg alltid ei liste liggande over plagg eg har lyst til å strikke.

For ungane treng jo varme kle til skule og barnehage, det er alltids kjekt med ei ny hue eller tre, og skal ein gje strikka julegåver kan det vere kjekt å komme igang tidleg.

Allereie i sommar kom eg igong med haustplagga. Ja, det blei fleirtal. Det var masse kjekke prosjekt å starte på, og ingenting som hasta å gjere ferdig.

 

UFO-haug

UFO-haug

Så no sit eg med denne haugen av UFO-ar. Frå botnen kan eg presentere Mariushettejakke str 10-12 år, må klippast opp, sy på ermer, strikke hette og kant og montere glidelås. Nr 2 er nok ei Mariushettejakke, denne i str 8-10 år, og samme arbeid gjenstår. Vidare ligg det ein lommegensar som manglar halskant og montering. Neste plagg er også ein lommegensar som er ferdig strikka, og berre manglar trådfest. Nedst øvst ligg ein tunika til meg sjølv som eg starta på den helga Fikslein blei døypt for eit par år sidan, den blei tatt fram igjen denne helga. Og øvst ligg ei snoningstrøje som manglar knappar. Mottakaren blei fødd i forrige veke, så den må prioriterast.

 

Heldigvis har forfattarane vore meir kreative med innhaldet enn titlane på bøkene.

Heldigvis har forfattarane vore meir kreative med innhaldet enn titlane på bøkene.

Men som alltid fristar det meir å sette igong med eit nytt prosjekt. Nokre nye bøker har det blitt, og strikkelista auka betrakteleg etter å ha bladd litt. Den nye Nøstebarnboka kjem nok til å bli ein klassikar som den forrige, Charlott Pettersen si bok «Strikk til mamma og mini» var ei god investering, i «Strik til banditter» av Signe Strømgaard har Snuppa plukka ut eit par tunikaer som står på ønskelista og i Marte Helgetun si bok er det mange fine idèar til plagg eg kan strikke til dei små eg kjenner.

 

Hos Paelas fristar Flora-toppen og huene til Klompelompe kan passe til dei fleste små hovud. Og så har sjølvsagt dei store garnprodusentane komme med nye mønster og nokre òg med nye spennande garntypar. Det er berre å velge og vrake i mønster og garn!

 

Kor finn du inspirasjon for tida?

 

– Nøstet –

 

 

Read Full Post »

Endeleg fekk eg avgårde ein liten pakke til Snellegutane. Inni den låg blant anna ribbebukse til Fikslein. Ei heilt enkel ribbebukse i enkel 2-tråds Nøstebarngarn, som er heilt perfekt under regntøy eller berre som kosebukse no som hausten startar. Sidan oppskrift på ribbebukse enten er i 3-trådsgarn, som eg tidligare har strikka til Snuppa,  eller anna tjukkere garn, blei det utrekningsmetoden for å finne ut kor mange masker eg skulle legge opp. Eg målte Fikslein rundt livet, målte på ei vrangbord kor mange masker eg trengte for 10 cm og fann ut kor mange det måtte bli for å passe med litt margin. Så følgte eg lengda på buksa i 3-trådsgarn, og felte inn sånn passe nedover beina.

Ribbebukse i 2-tråds Nøstebarngarn

Ribbebukse i 2-tråds Nøstebarngarn

Rapporten frå Snella seier at buksa passa perfekt og at den allereie er tatt i bruk, saman med Kattegenseren som eg strikka tidligare i år.

– Nøstet –

Read Full Post »

Snella sin Fikslein skal begynne i barnehage til hausten, og tante Nøstet har tatt på seg oppgåva å strikke litt barnehagekle.

Første plagg på planen var vest. Eg har fått melding om at Nøstebarnvesten Fikslein fekk til jul, har vore mykje brukt, så det er klart at han må få ein ny han kan ha i barnehagen. Vesten er strikka i Merino Extra Fine, og eg bestemte meg for å bruke det garnet eg hadde i garnlageret. Oppskrifta er ganske lik Nøstebarn si, men denne fann eg i Lene Holme Samsøe sitt hefte «Babystrik på pinde 3». Vesten endte opp med blå bakside sidan det plutselig var slutt på det brune garnet. Eg er normalt veldig opptatt av symmetri, men etter ei kort stund syns eg vesten blei ganske stilig med den blå baksida.

Viggo Vest frå Babystrik på pinde 3

Viggo Vest frå Babystrik på pinde 3

Neste prosjekt ut var Kattegenser frå Nøstebarnboka. Eg begynte på den då vi var på tur til Berlin, og har strikka på den litt innimellom andre prosjekt. Genseren er strikka i 2-tråds Nøstebarngarn, så det er ein tynn deilig genser som blir god under regntøy og leikedress når det ikkje er altfor kaldt.

Kattegenser

Kattegenser

Eg har strikka både bolen og ermane litt lengre enn i oppskrifta og har i tillegg lagt til vrangbord nederst. Då sklir den ikkje så lett opp når små tassar skal bøye seg i leiken. Det må nok etterkvart strikkast ei ribbukse som matchar. Nøstebarngarn og oppskrifter er favorittar som eg har strikka mykje av.

Kattar på rad og rekke

Kattar på rad og rekke

Nøstet –

Read Full Post »

Tidleg i haust strikka eg ribbegenser i Nøstebarngarn til Snuppa. Planen var å strikke buksa med det samme, men etter ein vridd rett og ein vrang ein heil genser var det andre prosjekt som frista meir. Og sidan ho allereie hadde ein Nøstebarndress til å ha i barnehagen, blei bukseprosjektet lagt på vent. Men så var det påtide å ta seg saman og få buksa strikka.

Ribbebukse

Ribbebukse

Ein vridd rett og ein vrang var ikkje noko kjekkare å strikke på buksa heller, men med eit så flott resultat så kan det vere eg hiv meg på ei til om ei stund!

Klar for kaldt veir!

Klar for kaldt veir!

Nøstebarnkle er og blir ein favoritt!

Nøstet –

Read Full Post »

Vest er eit veldig praktisk plagg til dei små. God og varm, og armane kan bevegast uten at noko strammar. Det fins mange flotte oppskrifter på vestar, og eg likar å prøve fleire. Tidlegare har eg blant anna strikka Viggo og singlet frå Lene Holme Samsøe. Uglevest er òg populært. Til jul strikka eg Nøstebarnvest til Snella sin Fikslein.

Nøstebarnvest

Nøstebarnvest

Dette var eit kjapt prosjekt som brukte lite garn. Vesten er strikka i ein del og sydd saman i sidene. Ein så enkel vest tåler litt sprek fasong på knappane, så ein kjapp tur innom knappelageret endte med stjerner.

– Nøstet – 

Read Full Post »

Trur ikkje eg blir det. Ikkje enda iallefall. Dette er vel den femte dressen eg har strikka og skulle eigentleg vere til Nevøen. Men sidan han veks raskere enn eg hadde planlagt var den allereie alt for liten når ullsesongen starta. Sidan det blant familie og vener er fødd fire gutar i år er det ikkje noko problem å finne mottaker. Så denne blir med meg til Bergen i helga og skal vere gåve til ein liten Oliver.

Nøstebarndress

Nøstebarndress

Nøstebarndressen er som vanleg strikka i originalgarnet, dobbelt tråd med 2-tråds Merinoull frå Nøstebarn.

 

– Nøstet –

Read Full Post »

Allerede i januar var eg igang med å planlegge haustgarderoba til ungane. Når eg var innom Nøstebarn såg eg eit nydeleg sett i Nøstestrikk med ribbegenser og ribbebukse i 3-tråds garn. Settet i heftet var i blått og grått, men det ville nok ikkje Snuppa ha godkjent. Eg bytta ut blått med raudt og håpa at det skulle gå bra.

RIbbegenser i 3-trådsgarn

RIbbegenser i 3-trådsgarn

Når eg har strikka ribb før har eg alltid strikka vanleg rett og vrang. I denne oppskrifta skulle det vere vridd rett og vrang. Resultatet blei mykje finare enn om det hadde vore strikka med vanleg rettmaske.

Ein vridd rett og ein vrang

Ein vridd rett og ein vrang

Genseren er strikka i str 4/5. Den blei litt lang, men det er kjekt at den kan vare ei stund. Den blei tatt i bruk umiddelbart og eg må berre hive meg rundt og strikke buksa som høyrer til.

– Nøstet –

Read Full Post »

Eg er stor tilhengar av Nøstebarnprodukt, og Nøstebarndressen er eit av favorittplagga eg lagar. Eg har sjølv brukt den til Snuppa, både når ho var baby og ein som ho no brukar under regnkle i barnehagen. Eg har òg strikka ein til grandnevøen. Det har eg skreve om i eit tidlegare innlegg. Så når eg skulle lage julegåve til Fikslein var ikkje valget vanskeleg. Ei heilt Nøstebarnsett, med dress, hue, sokkar og vottar. Alt i 2-tråds merinoull frå Nøstebarn. No er det ei stund til jul, men sidan han neppe skjønar kva julegåver er dette året synes eg det var greit å gje gåva tidleg sånn at den kan brukast over lengre tid.

Nøstebarndress i striper

Nøstebarndress i striper

Vottar, hue og sokkar i 2-tråds merinoull frå Nøstebarn

Vottar, hue og sokkar i 2-tråds merinoull frå Nøstebarn

Vel, det var iallefall idêen. Som vanleg har eg strikka plagga litt knappe i størrelsen, sjølv om eg trudde eg hadde tatt høgde for det med lengre rygg og ermer enn i oppskrifta, så dressen er truleg ikkje passeleg særlig meir enn frå no til jul. Hua er allereie for lita, så den skal strikkast på nytt…

Så får vi sjå om eg greier å halde meg, eller eg finn enda noko fint som må strikkast i julegåve.

– Nøstet – 

Read Full Post »

Om kort tid blir eg tante igjen. Min yngste bror blir pappa for første gang, og det er sjølvsagt stor stas for alle. Som tante tar eg sjølvsagt ansvar for at knøttet ikkje skal fryse, sjølv om det på kalenderen nærmer seg sommer er det ofte kjølig her på Vestlandet. Den vordende far ville ikkje vite kjønn på ultralyd, så tanta må heilgardere. Eg synes kvitt er kjempeflott på små babyer, men eg synes det er fryktelig kjedelig å strikke. Så då strikker eg heller to hentesett. Eit i rosa og eit i blått. Det er venta fleire babyer blant familie og venner, så det settet som ikkje blir gitt vekk no skal nok iløpet av året få ein mottaker.

Hentesett i gammalrosa alpakka

Jentesettet er altså i gammalrosa alpakka. Jakke, bukse og sokker har eg funne mønster til på garnstudio. Sokkane er nok noko av dei raraste eg har strikka. Litt usikker på om dei kan brukast, men det får stå si prøve. Sidan mykje av settet er rillestrikk brukte eg huemønsteret til Nøstebarn.

Dei nydelege knappane kjøpte eg på Bentes Boutique på Bjølsen ein gong for mange år sidan når eg og Snella var på ein av våre faste hobbyrunder i hovudstaden.

Nøstet –

Read Full Post »

«Strikk til Nøstebarn» av Kathrine Gregersen er ei av dei finaste strikkebøkene eg veit om. Fullstappa av basisoppskrifter, mest til liten, men òg nokre til dei litt større. Babyteppet frå boka i original 2-tråds merinoull fekk eg av tanta mi då Nøstegutten blei fødd for snart 8 år sidan. Ved første augekast synes eg ikkje det var særlig pent der det låg i naturfarge og rillestrikk, men det skulle vise seg å bli ei av dei finaste gåvene eg har fått. Teppet blei brukt sommar som vinter, i vogn, i bil og i seng. Då Klumpen blei fødd, arva han teppet, og då Snuppa kom til verda, brukte ho det ei stund òg. Men då måtte eg til slutt kaste teppet, som var heilt utslitt. Eg strikka umiddelbart eit nytt som Snuppa framleis bruker i trilla si. Og eg har strikka fleire i barselgåver. Ei fantastisk gåve å gje.

Ei anna oppskrift eg har brukt fleire gonger frå boka er «Heil dress i dobbel 2-tråds garn». Ypperlig plagg for barnehagebarn og kanskje dei som er litt større ôg. Lett å kle på seg sjøl og så slepp ein «buatrekken» som pappaen min kaller det, den kalde gufsen nedover ryggen når genser og bukse går kvar sin veg når ein bøyer seg. Denne hausten har eg strikka to dressar. Ein til Snuppa i str 3 år. Sidan den forrige dressen hennes var melert tenkte eg å gjere ein vri og strikke striper. Det blei ein fargerik dress som fekk grøne spøkelseknappar nederst og Snella og Petronella knappar med Rampeunge, øverst.

Nøstebarndress i str 3 år

Den andre dressen eg har strikka no er til grandnevøen min som blir 1 år i november. Sidan det er få som likar å strikke på den sida av familien føler eg eit lite ansvar for at den vesle krabaten skal halde seg god og varm gjennom vinteren. Dressen er strikka i str 2 år slik at han har litt å vekse i.

Nøstebarndress i str 2 år

Så fekk eg tidligare i haust høyre om at det blir fleire babyar å strikke til iløpet av våren. Strålande nyheiter, og eg heiv meg på pinnane. Ei «jakke med rundfelling» frå Nøstebarnboka blei til, strikka i Merino Extra Fine. Jakka fekk knall rosa kant og perlemorknappar. Om det blir gåve til ein av dei nevnte babyane er uvisst, men ei nydelig jakke blei det!

Jakke med rundfelling

Vil du ha meir inspirasjon til bruk av Nøstebarngarn eller vil sjå eksempler på produkt av Nøstebarnoppskrifter må du ta deg ein tur innom den flotte Nøstebloggen.

– Nøstet –

Read Full Post »