Sokkar til alle!

Eg har alltid eit par sokkar på pinnane. Dei ligg i ei lita strikkeveske som er lett å putte i veska om eg skal ein plass og får litt strikketid, og sidan sokkane eg strikker stort sett er utan mønster er det lett å strikke vidare uten å måtte lese kor ein er på eit mønster. 

Alle treng jo sokkar, så det er kjekt å ha nokre par liggande om det plutseleg kjem ein bursdag ein har gløymt, eller når julestrikkelista som vanleg er dobbelt så lang som det er muleg å komme gjennom. På bilete over har eg strikka ribbesokker. Klumpen fekk dei grøne og svarte, mens dei tre andre har flytta til ei niese, ein nevø og til min lillebror. Dei rosa er strikka i Lana Grossa sokkegarn som er veldig elastisk. Dei grøne og svarte er frå samme garnleverandør, men garnet liknar meir på Fabel. Dei brune med striper er i Fabel eller Regia og dei blå i tjukt raggegarn av ein eller anna type.

Tøffelsokkane strikka eg til ungane for å ha på hytta. Dei er strikka i Fritidsgarn i sjølve foten, sydd saman og strikka på eit par omgonger med superwashgarn til ribb før dei blei tova. Deretter strikker ein opp ribben med superwashgarn, eg har brukt Smart og Falk. Mønsteret finn du i Sandnes Tema 19 Toving. Angry Bird sokkane har eg strikka etter eit bilete, og desse er strikka i eit Rubin. Maskesting kan eg med fordel øve meir på. Det var Fikslein som fekk desse til 4-års dagen.

Vanilla Socks

Sokkane på denne siste kollasjen og dei to øverste på forrige bilete er Vanilla Socks, mønster frå Mina Phillip som har videopodcasten The Knitting Expat. Det er heilt enkle sokkar i glattstrikk med litt ribb øverst og hæl av forkorta rader. Desse strikker eg med magic loop og begge sokkane samtidig. Den einaste endringen eg gjer er at eg feller litt fortere på tåa. Eg har ei stor korg med fleirfarga sokkegarn etter at eg var så fascinert av slikt garn for mange år sidan, nokon av nøsta er det berre eit av og nokre er restar frå andre prosjekt. No prøver eg å få strikka det opp med å blande fleire nøster, putte inn litt einsfarga ribb, hæl og tå der garnet ikkje rekk. Det meste av garnet er Opal, Fabel og Regia. Eg er ikkje så nøye på at sokkane skal bli heilt like, så om eg har berre eit nøste starter  eg frå innsida av nøstet til den eine sokken og frå utsida til den andre. 4 av desse para er gitt vekk i gåver og dei to siste blir nok gitt til jul. Og det er sjølvsagt eit par på pinnane som blir strikka på innimellom.
– Nøstet –

Reklame

Read Full Post »

Bellajakke i Sterk

 Hausten er her definitivt, sjølv om vestlandet har finare dagar enn vi hadde heile sommaren. Men kalde morgonar og kveldar gjer at det er godt å ha ei ulljakke i beredskap. Forrige sesong strikka eg Bellajakke i Sterk til Snuppa. Bellamønsteret er enkelt og dekorativt, og det har eg strikka før i tunika og Snella har strikka kjole. Mønsteret er som sikkert dei fleste veit frå hefta til Lene Holme Samsøe.

Bellajakke i Sterk



Denne sesongen er jakka framleis i bruk. Den har blitt litt vid i halsen etter mykje bruk, så her om dagen hekla eg rundt halskanten for å stramme den opp litt. Det ser ut til å verke fint, og Snuppa er fornøgd med å kunne bruke favorittjakka enda ei stund til.
– Nøstet –

Read Full Post »

Fanadress med rundfelling

Har du ikkje starta på haustgarderoben til dei små enda, så er det på tide! Det er tida for barnehagestart, og snart må ulla fram og på. 

Eit av standardplagga i barnehagegarderoben er ein ulldress. Det fins mange flotte mønster, og kvart år kjem det fleire. Eit av dei som kom i fjor haust, var Fanadress med rundfelling. Eg blei umiddelbart i fyr og flamme, og spurte Snella om ikkje Gullet trengte ein slik. Heldigvis passa det bra. 

Fanadress i Rauma Baby Panda

Strikkefakta:

Mønster: Modell 26-1 frå hefte Design baby 26

Garn: Rauma baby Panda, fargane som er oppgitt i mønsteret. 

Pinne: 2,5

Finaste Gullet i Fanadress

Fargane kunne ikkje passa mottakar betre! Rauma Baby Panda har fleire flotte fargar og er eit veldig godt garn å strikke med. I tillegg held plagga seg kjempebra. Dette garnet har eg strikka hentesett i og Snella har strikka babybukse.

Tidligare har eg strikka Høstløvdress til samme gut, og brødrene har fått både Nøstebarndress, Mariusdress og Snorkedress. Denne hausten trur eg alle har den ulla dei trenger, men eg skal nok finne nokre kjekke prosjekt likevel. Det er jo snart på tide å tenke på julegåver òg …
– Nøstet –

Read Full Post »

Baggy hekla hue

 Huer er enkle og kjappe prosjekt. Snuppa er veldig glad i heimelaga huer og vil helst ha noko som ingen andre har. Bortsett frå bestevenninna, ho må eg gjerne lage samme til. Denne hua hekla eg i vinter og den har blitt svært mykje brukt.

Baggy hue

 
  Heklefakta:

Garn: Arwetta Classic, hekla med dobbelt garn.

Oppskrift: frå Bauta Witch, la opp litt færre masker og hekla den litt kortere sidan mottaker var 6 år.

Krok: 4.0

 

Denne hua blir det nok hekla ein versjon til av no i sommar. I tillegg er planen å strikke opp nokre huer som Snuppa kan gje klasseveninnene i bursdagsgåver utover hausten. Perfekt sommerprosjekt!
–Nøstet –

Read Full Post »

Ein favoritt

 

Prikkejakke i Sterk

Eit av favorittmønstera frå eit av favoritthefta av favorittdesigneren, strikka i favorittgarnet.  Prikkejakke frå Børnestrik med pinde 3,5 til 4, designa av Lene Holme Samsøe, og strikka i Sterk.Frå det heftet har eg tidligare strikka Siggis Slipover og Bellatunika. 

Denne jakka blei julegåve til Fikslein. Garnet er overskuddsgarn frå Mariusjakkene eg strikka til gutane mine ifjor. Eg strikka jakka på pinne 3,5 og strikka str 6 år, men strikka lengda til midt mellom str 4 og 6.

Eg strikka jakka fram og tilbake som det stod i oppskrifta for å unngå at det blei ein tjukk kant ved sida av knappestolpen om eg hadde strikka rundt og klipt opp. Eg har lite erfaring med mønsterstrikk på vranga, og det er ikkje noko eg har lyst til å gjere igjen. Det gjekk  veldig sakte og det var ikkje noko kjekt. Men jakka blei kjempefin når den endeleg blei ferdig.

Klok av skade var eg ikkje i tvil om at skulle strikke neste jakke rundt og deretter klippe opp. Denne jakka er strikka i Tove og Pt2, så den er frå Børnestrik på pinde 2,5 til 3. Den er strikka i str 6 mnd og frå bunnen og opp i motsetning til jakkene i større størrelsar der ein startar på toppen. Mønsteret gjekk fort og greit å strikke når det berre var rettmasker, og eg prøvde heklemetoden før eg klipte opp mellom knappestolpane.

Prikkejakke i Pt2 og Tove

Denne jakka er sendt avgårde til ei lita jente som kom til verda like før jul. Heldigvis er det fleire små på veg blant familie og vener, så eg kan framleis strikke babykle og små størrelsar.

– Nøstet –

Read Full Post »

Panneband frå Klompelompe

 På hausten ifjor kjøpte eg Klompelompeboka. Eg hadde følgt dei på Instagram ei stund og hadde gleda meg til å få tak i boka. Ei tjukk, fin bok med masse flotte bilete av nydelege plagg. 

 
Det første prosjektet frå boka blei panneband. I garnlageret fann eg masse rester av Merino Extra Fine frå Drops, og det garnet passer perfekt til hodeplagg sidan det har lav kløfaktor. Sidan eg strikker litt stramt måtte eg justere litt på maskeantalet på nokre av dei sånn at dei skulle passe dei eldste mottakarane.

Dei prikkete er Henrypanneband og dei med blome på er Henriettepanneband. På Henrypannebanda har eg strikka ei rad med prikker mindre enn i oppskrifta fordi eg ikkje liker at panneband nesten går saman på toppen av hovudet som ei hue. På Henriettepannebanda prøvde eg meg fram for å få ein finare overgong  frå mønsterstrikk til ribbestrikk. Eg trur eg endte opp med å strikke ein ekstra omgong med mønsterfarge. Mulig det har med at eg strikker litt stramt, men når eg følgde oppskrifta «slukte» pannebanda eine omgongen slik at den ikkje viste.

Dei fleste pannebanda blei gitt vekk i julegåver, men eit par har eg lagt i gåvekassa i tilfelle det kjem ein plutseleg bursdagsinvitasjon.
– Nøstet-  

Read Full Post »

Tøft trofé – hekla Helge-elg

Endeleg eit høve til å hekle min variant av den kule troféelgen Helge! Den har stått på lista lenge, og med striper er den eit perfekt restegarnsprosjekt. Elgen blir prikken over i-en på dåpsgåva til ein tysk gudson med foreldre som alltid er like skuffa kvar gong dei ikkje ser ein elg når dei er i Noreg.

*

 

Heklefakta
Mønster: Inspirert av elgen Helge hos hvadbiertenker.dk (pdf), men ca. halvparten så stor og med eigendesigna gevir, knappar til auge og nasebor, og med ei lita hempe så han kan henge på veggen.
Garn: restegarn frå lageret
Heklenål: 2,5

Her er lille-Helge klar til å trekke sørover og flytte inn på eit tysk barnerom.

–Snella–

 

Read Full Post »

Lommegenser

Nokon gongar startar prosjektet med at ein finn eit mønster ein berre MÅ prøve. Andre gongar, som i dette tilfelle, var det garnet som lokka. Oftare og oftare kom eg over fine ord om Shetland Soft, og når haustgarderoben til Snuppa skulle planleggast fann eg ut at det var på tide å teste ut dette garnet. Inne på nettbutikken til Malsen og Mor blei eg overrumpla over alle dei flotte fargane! Kva skulle eg velge? Første plan var å strikke prikkejakke frå Lene Holme Samsøe, eg hadde lilla Nøstebarngarn som eg tenkte eg kunne bruke til kantfarge og grønt til prikkar. Kanskje oransje til bunnfarge? Jau, den såg flott ut. Men så var det jo så mange andre fargar. Den turkise var skikkeleg flott (og nevøen skal jo ha julegåve), og når eg såg mønster på Lommegenser havna både mønster og garn i handlekorga på eit blunk. Kort tid etter låg det i postkassa.

 

Lommegenser til nevøen

Lommegenser, turkis og brunt tok eg med meg på ferie i sommar. Sjølv om garnet var seigt og klissete og det lukta sauefjøs, så var lommegenseren eit veldig kjekt prosjekt som gjekk superkjapt å strikke. Så kjekt var det at når eg kom heim og fann ut at det nydelege oransje garnet ikkje passa med det grøne til prikkar, heiv eg meg rundt og strikka ein lommegenser til.

 

Lommegenser til Snuppa

Men så skjedde det som av og til ofte skjer. Det blir kjekkere å starte på eit nytt prosjekt enn å fullføre det gamle. Så dei to lommegensarane blei liggande med lause trådender og framleis stive og klissete. Lenge. Heilt til i forrige veke då det plutseleg blei så kaldt at det måtte tjukkare gensere med i barnehagen. Ein liten time med trådfesting, ei runde i vaskemaskina med Milo og vips var to deilige, mjuke gensere klare for bruk.

No har eg høyrt at Shetland Soft blir solgt ferdig vaska, så det blir nok fleire bestillingar etterkvart!

 

– Nøstet –

Read Full Post »

Inspirasjon til haustens strikkeliste

Det er haust i lufta, og då kriblar det ekstra mykje i strikkepinnane! Samstundes flaumar det over av inspirasjon, både på bloggar, instagram og i nye bøker. I tillegg har eg alltid ei liste liggande over plagg eg har lyst til å strikke.

For ungane treng jo varme kle til skule og barnehage, det er alltids kjekt med ei ny hue eller tre, og skal ein gje strikka julegåver kan det vere kjekt å komme igang tidleg.

Allereie i sommar kom eg igong med haustplagga. Ja, det blei fleirtal. Det var masse kjekke prosjekt å starte på, og ingenting som hasta å gjere ferdig.

 

UFO-haug

Så no sit eg med denne haugen av UFO-ar. Frå botnen kan eg presentere Mariushettejakke str 10-12 år, må klippast opp, sy på ermer, strikke hette og kant og montere glidelås. Nr 2 er nok ei Mariushettejakke, denne i str 8-10 år, og samme arbeid gjenstår. Vidare ligg det ein lommegensar som manglar halskant og montering. Neste plagg er også ein lommegensar som er ferdig strikka, og berre manglar trådfest. Nedst øvst ligg ein tunika til meg sjølv som eg starta på den helga Fikslein blei døypt for eit par år sidan, den blei tatt fram igjen denne helga. Og øvst ligg ei snoningstrøje som manglar knappar. Mottakaren blei fødd i forrige veke, så den må prioriterast.

 

Heldigvis har forfattarane vore meir kreative med innhaldet enn titlane på bøkene.

Men som alltid fristar det meir å sette igong med eit nytt prosjekt. Nokre nye bøker har det blitt, og strikkelista auka betrakteleg etter å ha bladd litt. Den nye Nøstebarnboka kjem nok til å bli ein klassikar som den forrige, Charlott Pettersen si bok «Strikk til mamma og mini» var ei god investering, i «Strik til banditter» av Signe Strømgaard har Snuppa plukka ut eit par tunikaer som står på ønskelista og i Marte Helgetun si bok er det mange fine idèar til plagg eg kan strikke til dei små eg kjenner.

 

Hos Paelas fristar Flora-toppen og huene til Klompelompe kan passe til dei fleste små hovud. Og så har sjølvsagt dei store garnprodusentane komme med nye mønster og nokre òg med nye spennande garntypar. Det er berre å velge og vrake i mønster og garn!

 

Kor finn du inspirasjon for tida?

 

– Nøstet –

 

 

Read Full Post »

Æsj! Gutesko!

Etter at vi bygde hytte brukar vi dei fleste helgane der. Denne helga er vi derimot heime, og den må difor nyttast godt til å få gjort alle ærend vi ikkje rekk etter jobb. Idag stod det oppgrading av skogarderoba til ungane på planen. Med godt mot traska vi innom dei to skobutikkane som fins i byen for å finne joggesko og tøysko. Det skulle vise seg at det hadde vore mange før oss på samme ærend, så utvalet var skuffande. Til gutane fann eg tilslutt det eg var ute etter, men til Snuppa fantes det ikkje eit einaste par å oppdrive. Som ein siste utveg tok eg fram desse brune tøyskoa frå «gutehylla» på butikken.

ÆSJ! GUTESKO!

Desse var vel fine? Desse passar til alt! Eg prøvde å vere så overbevisande som mogleg. Snuppa var skeptisk, men sa ja under tvil.

Vel heime oppdagar ho at storebroren har fått akkurat same sko, og krisa er eit faktum. ÆSJ! GUTESKO!

Då er det godt at ho mor har eit velfylt hobbyrom. Ein time under parasollen med nål, tråd og nokre strykemerker, og vips

Jentesko! Hurra!

JENTESKO!

 

Puuh!

 

– Nøstet –

Read Full Post »