Haust, halloween og hekla hovudskallesjal

Vi er klare for innrykk! Ytterdøra er blitt småskummel, og ekle hender av matgodkjende gummihanskar fulle av snop ligg og ventar. Vi kjem vel alltid til å ønske at det heller kom julebukkar, men vi seier: Velkomne, godteskrømt!

                                                                   Dei hekla skallane er eit sjal av restegarn frå lageret. Artig prosjekt, men lett å gjere feil! Eg auka litt meir enn oppskrifta sa, for at sjalet skulle bli breiare og ikkje gå så langt ned på ryggen.

Heklefakta Mønster Lost Souls Skull Shawl by Maryetta Roy (gratis på Ravelry) Heklenål 3,5 Garn uidentifisert raudt restegarn i ull

 

–Snella–

Read Full Post »

Allehelgenstemning med fylt graskar

Hausten er den beste tida. Då blir eg alltid inspirert og får lyst å lage god mat og strikke lune plagg. I år blir det allehelgen i Sverige, så eg kan ikkje ønske godteskrømta velkomne, men graskar blir servert i heimen opptil fleire gongar i oktober! Eg har tidlegare delt den deilige oppskrifta mi på graskarpai og på bakt flaskegraskar. I år skal fylt graskar få skape stemning rundt bordet.

Oppskrift på fylt graskar à la Snella:

1 graskar på eitt kg (eller litt over)
800 g karbonadedeig
150 g god chorizopølse (Bacon er eit alternativ)
1 liten finhakka løk
1 neve sopp i skiver
1 neve svarte oliven utan stein (kan sløyfast)
1 finhakka chili
ca 3 dl ris
riven parmesan
litt god olivenolje
fersk timian
salt og pepar

1 glas ferdig salsa

Skjer toppen av graskaret, grav ut gugget i midten og spyl innsida godt etterpå. Kok risen og fres kjøttdeig og chorizo litt i ei panne. Bland dette saman med alt det andre unntatt parmesan. Ha fyllet i graskaret og strø parmesan på toppen. Steik alt på 170 grader i ein times tid. Plasser heile stasen på bordet, og ikkje gløym å få med graskarkjøt når du auser opp. Server med salsa, god vin og gjerne litt salat.

Eg kjem nok til å trekke i den fine sengehyggen min, for eg kjenner meg litt som eit graskar i den.

–Snella–

Read Full Post »

Velkomne, godteskrømt!

Eg kom til å tenke på det i dag. Det kan komme godteskrømt i kveld. Eg er jo blitt sånn som bur i hus i eit nabolag, og her kan det vere ein sterk tradisjon for slikt.

Likar eg at ein slik tradisjon etablerer seg her i landet? Tja. Tjei.

Synest eg det hadde vore betre om vi heller heldt i hevd julebukktradisjonen? Ja.

Vil eg bli kjent med naboane? Ja.

Vil eg vere den sure nye nabokjerringa? Definitivt ikkje.

Vil eg ta vel i mot småfolk som ringer på? Absolutt.

No fell mørkret på. Lysa er kveikte. Eg er klar. Velkomne, godteskrømt!

–Snella–

Read Full Post »

Sengehygge og våketåke

Vi er i ammetåke og våketåke. Det er heilt utruleg kva eit halvt år utan søvn kan gjere med ein. Her om dagen prøvde herr Fiks å steike pizza i oppvaskmaskina.

Men når ein skal amme om natta, må ein i det minste vere varm og god no når haustkulda kjem krypande. Og kva passar vel betre enn eit plagg med det treffande namnet «sengehygge»?

Sengehygge til ammetåka

Dette mønsteret frå Garnstudio såg fint ut, med herlege trompetarmar og krage som går godt opp i nakken.

Det perfekte hausgarnet dukka opp i flytteprosessen – rustraudt Vestlandsgarn eg hamstra på sal då fargen skulle gå ut. Nok var det ikkje, så eg spedde på med litt grønt og kvitt.

Kanskje ikkje tidenes lekraste plagg, men varmt og artig. Og kollegaene mine kom med rosande ord då eg brukte den på jobb her ein dag eg ikkje hadde noko anna grautfritt å ha på meg.

I sengehyggen kjenner eg meg litt som ein figur i Harry Potter, og litt som eit graskar. Det er definitivt antrekket for Halloween i tilfelle det kjem godteskrømt.

–Snella–

Read Full Post »

Graskarpai – perfekt kvelds

Haust, sprakande fargar, lange skjerf, varm te, ullkjolar og graskar.

Som ung studine i Tyskland fekk eg smaken på graskar, eller Kürbis som det heiter på tysk. Er ikkje et eit flott ord? Nesten til å ete opp, synest eg. Eit par spesielt gode oppskrifter vart med på flyttelasset heim att, og denne graskarpaien har eg servert som ein del av standardrepertoaret mitt i årevis. Originaloppskrifta fann eg i Brigitte.

Oppskrifta gir pai i ei lita langpanne, nok til lett kvelds for åtte personar eller middag for fire. Server med salat og skummande øl.

Deig:

Rør og elt saman 150 g smør, 150 gram kesam, 1 ts salt, 6 dl kveitemjøl og ein skvett vatn (slik at deiga heng saman). La deiga stå i kjøleskåp under plast medan du gjer klart fyllet.

Har eg det travelt, hender det eg kjøper ferdig paideig på butikken. Men eg unngår det viss eg kan, for den typen dei sel på min nærbutikk, inneheld skummelt transfett (delvis herda fett).

Fyll:

ca. 1 kg graskar
3 ss hakka soltørka tomater i olje
1 liten løk
2 kvitløksfedd
1 raud chili
salt og pepar

ein pakke fetaost
svarte oliven utan stein

4 egg
1,5 dl kremfløyte
hakka urter

Fres hakka løk, kvitløk og chili (ta vekk frøa og dei kvite hinnene inni først så det ikkje blir for sterkt) og tomatar i olje i ei steikepanne i eit par minutt.

Tips: I snellefamilien er det mange som har løkallergi. Vil du unngå løk og kvitløk, går det an å bruke grøn paprika i staden i denne oppskrifta.

Ha i graskarkjøt i terningar og steik vidare i fem minutt til. Smak til med salt og pepar.

Trykk paideiga ut i smurt form (altså den vesle langpanna) og ha i fyllet frå steikepanna. Visp saman egg, fløyte og urter og ha over. Strø over fetaost i terningar og svarte oliven til slutt. Steik på 200 grader i 30 minutt.

– Snella –

Read Full Post »

Allehelgen og halloween

Eg er glad i språk, helst godt språk. Eg likar både engelsk og norsk, og eg blir glad når eg høyrer gode norske ord for engelske lånord.

Det hender at vi  klarer vi å finne verkeleg gode, norske ord som slår igjennom og går inn i daglegspråket. Døme på det er nakkesleng (for whiplash) og minnepinne (for memory stick) – eller hugsekjepp, som nokon seier med glimt i auget.

Halloween

Ordet «halloween» har vi lånt frå engelsk. Det engelske ordet er ei samandraging av «All Hallow Even». Den kvelden svarer til norsk «helgemessaftan» eller «allehelgensaftan»,
31. oktober. Høgtida var opphavleg til minne om heilagmenn og martyrar, og mange brukar denne tida til å minnast kjære som er gått bort.

Den halloweenfeiringa som har fått fotfeste også her hos oss, har opphav i gamle ritar som ikkje har med kyrkjelege tradisjonar å gjere. Derfor kan det kanskje passe å skille mellom halloween og allehelgensaftan/helgemessaftan på norsk.

Eit alternativ eg har høyrd, er «graskarafttan eller «graskarkveld» (Graskar må sjølvsagt ikkje forvekslast med «grasenkemann», eller kanskje det passar?  Tji-hi.)

Godteskrømt

Tradisjonelt går vi julebukk eller nyttårsbukk her i landet, men «graskarbukk» om dei skumle som rek i gatene denne kvelden, kling rart i øyra mine. Så høyrde eg nokon seie at dei skulle «gå godteskrømt». Det er jo glitrande!

Trick or treat

Her finst det mange norske variantar: «godteri eller fanteri», «trolleri eller godteri», «snask eller snusk» og «grøss eller godteri» – og «knask eller knep». Det siste stammar visstnok frå ei Donald Duck-omsetjing frå 60-åra.

Ja, og så har vi sjølvsagt Nemi-versjonen, «digg eller deng»:

Nemi av Lise Myhre

– Snella –

 

Read Full Post »